ఆజాద్ వద్దకు కాంగ్రెస్ నేతల క్యూ: ట్రబుల్ షూటర్‌ను కలిసిన గద్దర్

By Srinivas

Published: Tuesday, May 17, 2011, 9:22 [IST]

హైదరాబాద్: ఆంధ్రప్రదేశ్ రాష్ట్ర వ్యవహారాల ఇంఛార్జ్, కేంద్రమంత్రి గులాం నబీ ఆజాద్‌ను కలిసేందుకు కాంగ్రెసు నేతలు వరుస కడుతున్నారు. ఇప్పటికి ముఖ్యమంత్రి కిరణ్ కుమార్ రెడ్డిపై పలువురు మంత్రులు, ఎమ్మెల్యేలు ఆజాద్‌కు ఫిర్యాదు చేసినట్టు కూడా వార్తలు వచ్చాయి. మంగళవారం కూడా ఆజాద్ వద్దకు భారీగా నేతలు క్యూ కడుతున్నారు. మంత్రులు వట్టి వసంత్ కుమార్, పితాని సత్యనారాయణ, మాజీ మంత్రులు వైయస్ వివేకానందరెడ్డి, షబ్బీర్ అలీ, సురేష్ రెడ్డి, ఎంపీ పొన్నం ప్రభాకర్, కాంగ్రెసు సీనియర్ నేత కె కేశవరావు తదితరులు వరుస కట్టారు. తెలంగాణ ప్రజా ఫ్రంట్ నేత గద్దర్ కూడా ఆజాద్‌ను కలిశారు. కాగా ఆజాద్ రాకతో గాంధీభవన్ నాయకులతో కలకలలాడుతూ కనిపిస్తోంది.

కాగా ఆజాద్‌ను కలిసిన అనంతరం గద్దర్ విలేకరులతో మాట్లాడారు. కేంద్రంలోని కాంగ్రెసు ప్రభుత్వం డిసెంబర్ 9న చేసిన తెలంగాణ ప్రకటనకు కట్టుబడి ఉండాలని ఆయన కోరారు. నాడు కాంగ్రెసు సోనియా పుట్టిన రోజు కానుకగా తెలంగాణ ప్రకటించిందని ఆందరూ భావించారని, కానీ ఆ తర్వాత దానిని వెనక్కి తీసుకోవడం సరికాదన్నారు. ఇప్పటికైనా తెలంగాణ ప్రజల మనోభావాలను దృష్టిలో ఉంచుకొని ప్రత్యేక రాష్ట్రం దిశగా చర్యలు తీసుకోవాలని కోరారు. చెన్నారెడ్డి సమయంలోని తెలంగాణ ఉద్యమం నాయకుల చేతుల్లో ఉండేదని, ఇప్పటి ఉద్యమం ప్రజల చేతుల్లో ఉందన్నారు.

Published On May 17, 2011