వైయస్‌ జగన్‌కు చాలా భయం పట్టుకుంది: పయ్యావుల కేశవ్

By Srinivas

Published: Tuesday, May 17, 2011, 15:47 [IST]

హైదరాబాద్: వైయస్ఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తెలుగుదేశం పార్టీ అంటే చాలా భయం పట్టుకుందని అందుకే జగన్ నిత్యం తెలుగుదేశం పార్టీని, పార్టీ అధ్యక్షుడు చంద్రబాబునాయుడును లక్ష్యంగా చేసుకొని విమర్శలు చేస్తున్నారని మంగళవారం ఎన్టీఆర్ ట్రస్ట్ భవన్‌లో ఏర్పాటు చేసిన విలేకరుల సమావేశంలో ధ్వజమెత్తారు. నిత్యం చంద్రబాబు వ్యవసాయం దండుగ అన్నారని జగన్ చెబుతున్నారని చంద్రబాబు ఎప్పుడు ఆ వ్యాఖ్యలు చేశారో నిరూపించాలని సవాల్ చేశారు. కేవలం ఒక సత్యాన్ని పదే పదే చెప్పి నిజం చేయాలనే ఉద్దేశ్యంతో జగన్ వెళుతున్నారన్నారు. ఆయన కూడా తండ్రిలాగే గోబెల్స్ ప్రచారం ప్రారంభించారన్నారు.

కాంగ్రెసుతో జగన్ ఒప్పందం కుదుర్చుకున్నారని, అందులో భాగంగానే గుంటూరు జిల్లాలోని రైతు దీక్షలో కేవలం చంద్రబాబునాయుడుని లక్ష్యంగా చేసుకొని విమర్శలు చేశారని ఆరోపించారు. కాంగ్రెసు, జగన్ మధ్య మ్యాచ్ ఫిక్సింగ్ ఉందనడానికి కేంద్ర మంత్రులు ఆంటోనీ, చిదంబరం వ్యాఖ్యలే మంచి నిదర్శనం అన్నారు. 2జి కుంభకోణంలో రాజా, కనిమొళి, కామన్వెల్తు క్రీడల అవినీతిలో సురేష్ కల్మాడీపే చర్యలు తీసుకున్న కేంద్రంలోని యుపిఏ ప్రభుత్వం జగన్ అవినీతిపై ఎందుకు చర్యలు తీసుకోవడం లేదని ఆయన ప్రశ్నించారు. కేవలం వారి మధ్య మ్యాచ్ ఫిక్సింగ్ ఉన్నందువల్లే ఆయనపై చర్యలు తీసుకోవడం లేదన్నారు.

Published On May 17, 2011