ఇరుకున పడిన కరుణానిధి, కక్కలేని మింగలేని పరిస్థితి

చెన్నై: తన ముద్దుల కూతురు, పార్లమెంటు సభ్యురాలు కనిమొళి అరెస్టుతో డిఎంకె అధినేత, తమిళనాడు మాజీ ముఖ్యమంత్రి కరుణానిధి ఇరకాటంలో పడ్డారు. ఆయనకు కక్కలేని మింగలేని పరిస్థితి ఏర్పడింది. అధికారంలో కోల్పోయి ఓ వైపు, కనిమొళి అరెస్టయి మరో వైపు ఆయన తీవ్ర వేదనకు గురవుతున్నారని చెప్పవచ్చు. ఐక్య ప్రగతిశీల కూటమి (యుపిఎ) నుంచి వైదొలుగుతామని కాంగ్రెసు పార్టీని బెదిరించే అవకాశం కూడా కరుణానిధికి లేకుండా పోయింది. రాష్ట్రంలో అధికారం కోల్పోయిన స్థితిలో కాంగ్రెసుతో తెగదెంపులు చేసుకుని కేంద్రంలో కూడా అధికారానికి దూరమయ్యే పరిస్థితి కరుణానిధికి లేదు. కాంగ్రెసుతో తెగదెంపులు చేసుకుంటే మరిన్ని కష్టాలు ముంచుకు వచ్చినా ఆశ్చర్యం లేదు.

డిఎంకె యుపిఎ నుంచి వైదొలిగి తమ ప్రభుత్వానికి మద్దతు ఉపసంహరించుకున్నా ఫరవా లేదనే స్థితికి కాంగ్రెసు అధిష్టానం ఎప్పుడో చేరుకుంది. అవసరమైతే అన్నాడియంకె మద్దతు తీసుకోవాలనే ఆలోచనలో కూడా ఉంది. అందులో భాగంగానే తమిళనాడు శానససభ ఎన్నికల్లో గెలుపొందగానే తమిళనాడు ముఖ్యమంత్రి జయలలితను కాంగ్రెసు అధ్యక్షురాలు టీ పార్టీకి ఆహ్వానించారు. జయలలితను సోనియా టీ పార్టీకి అహ్వానించడం కూడా కరుణానిధికి మింగుడు పడడం లేదు.

తన సాహిత్య వారసురాలిగా ముందుకు వచ్చిన తన ముద్దుల కూతురు కనిమొళి అరెస్టు కావడం వ్యక్తిగతంగా కరుణానిధి తనకు పెద్ద దెబ్బగానే భావిస్తారు. అయితే, కాంగ్రెసుతో డిఎంకెతో అంత సఖ్యతగా మెలిగే అవకాశం లేదు. విభేదాలతోనే యుపిఎలోనే కొనసాగాలని కరుణానిధి నిర్ణయించుకోవచ్చు. బెదిరించి పని చక్కబెట్టుకునే పరిస్థితి లేదు కాబట్టి దగ్గరగా ఉంటూ పనులు చక్కబెట్టుకునే అవకాశాల కోసమే ఆయన ఆలోచించవచ్చు.

English summary

Dismissal of his daughter Kanimozhi's bail is a big blow to DMK president Karunanidhi. He may not pull out from UPA immediately.