మంత్రి జూపల్లి కృష్ణారావు అరెస్టు, ఆత్మహత్య చేసుకుంటానని బెదిరింపు

మహబూబ్‌నగర్: మంత్రి పదవికి రాజీనామా చేసి తెలంగాణ సాధన కోసం మహబూబ్‌నగర్ జిల్లాలో పాదయాత్ర చేపట్టిన జూపల్లి కృష్ణా రావును పోలీసులు శనివారం ఉదయం అరెస్టు చేశారు. మహబూబ్‌నగర్ జిల్లా గద్వాలలో జూపల్లి కృష్ణా రావు పాదయాత్రను అడ్డుకోవడానికి మరో మంత్రి డికె అరుణ, తన అనుచరులతో సిద్ధం కావడంతో తీవ్ర ఉద్రిక్త పరిస్థితి నెలకొంది. దీంతో జూపల్లి కృష్ణారావును పోలీసులు అరెస్టు చేయడానికి ప్రయత్నించారు. అయితే, అరెస్టు చేస్తే ఆత్మహత్య చేసుకుంటానని ఆయన మెడపై కత్తి పెట్టుకున్నారు. దీంతో పోలీసులు కాస్తా వెనక్కి తగ్గారు. ఆ తర్వాత ఆయనను పోలీసులు ఐజలో అరెస్టు చేశారు.

కృష్ణారావు అరెస్టును ప్రతిఘటించడానికి ఆయన అనుచరులు ప్రయత్నించారు. ఈ సమయంలో తీవ్ర ఉద్రిక్తత నెలకొంది. అయితే, ఎట్టకేలకు అరెస్టు చేశారు. తన పాదయాత్రను అడ్డుకోవడానికి ప్రయత్నించిన మంత్రి డికె అరుణపై ఆయన తీవ్ర వ్యాఖ్యలు చేశారు. డికె ఆరుణ సీమాంధ్రులతో కలిసిపోయారని ఆయన ఆరోపించారు. ఆరు నూరైనా తన పాదయాత్ర కొనసాగుతుందని ఆయన అన్నారు. తన అరెస్టు ప్రజాస్వామ్య ఖూనీ ఆయన అన్నారు. తెలంగాణ కోసం ప్రాణ త్యాగానికైనా సిద్దమని ఆయన ప్రకటించారు. అరెస్టు చేసి తనను లొంగదీసుకోలేరని ఆయన అన్నారు. తనకు ఎవరిపైనా కక్ష లేదని ఆయన అన్నారు. తన పాదయాత్రను అడ్డుకున్న విషయంలో ముఖ్యమంత్రి జోక్యం చేసుకోవాలని ఆయన కోరారు.

English summary

Minister Jupalli Krishna rao, who is on padaytara for Telangana, arrested at Aija of Mahaboob Nagar district today morning