చంద్రబాబుకు వైయస్ జగన్ దెబ్బ, ఖాళీ అవుతున్న టిడిపి

By Pratap

Published: Wednesday, May 25, 2011, 10:09 [IST]

హైదరాబాద్‌: తెలుగుదేశం పార్టీ అధ్యక్షుడు నారా చంద్రబాబు నాయుడిని వైయస్సార్ కాంగ్రెసు పార్టీ అధ్యక్షుడు వైయస్ జగన్ తీవ్రంగానే దెబ్బ తీసే వాతావరణం ఉంది. పార్టీ అంతర్గత విభేదాలతో తల బొప్పికడుతున్న తరుణంలోనే పార్టీ కార్యకర్తులు, ద్వితీయ శ్రేణి నాయకులు వైయస్ జగన్ వైపు చూస్తున్నారు. వివిధ జిల్లాల్లో చంద్రబాబుకు సన్నిహితులైన నాయుకులే దశాబ్దాలుగా ఆధిపత్యం చెలాయిస్తుండడంతో అవకాశం కోసం ఎదురు చూస్తున్న తెలుగుదేశం నాయకులు వైయస్ జగన్ వైపు వెళ్లడం ఖాయమని అంటున్నారు. దాదాపు 40 - 50 శాసనసభా నియోజకవర్గాల్లో మూడు దశాబ్దాలుగా చంద్రబాబుకు సన్నిహితులైనవారిదే ఆధిపత్యం. వారి వల్ల కొత్తవారికి పోటీ చేసే అవకాశం దక్కడం లేదు.

తునిలో యనమల రామకృష్ణుడు తిష్ట వేసినట్లుగా పలు నియోజక వర్గాల్లో నాయకులు దస్తీలు వేసుకుని కూర్చుకున్నారు. దానికితోడు, వివిధ జిల్లాల్లో కొంత మంది నాయకుల ఆధిపత్య, ఏకపక్ష ధోరణులు మిగతా నాయకులు క్రియాశీలక పాత్ర వహించే వాతావరణాన్ని దెబ్బ తీస్తున్నాయి. ప్రకాశంలో కరణం బలరామ్, గుంటూరులో కోడెల శివప్రసాద రావు, విజయనగరం జిల్లాలో అశోక్ గజపతిరాజు, శ్రీకాకుళం జిల్లాలో ఎర్రంనాయుడు - ఇలా చెప్పుకుంటే పోతే ఇటువంటి నాయకులు చాలా మందే ఉంటారు. దీంతో వారితో కలిసి పనిచేయడానికి అవకాశం లేని నాయకులు వైయస్ జగన్ వైపు చూస్తున్నట్లు తెలుస్తోంది.

గత ఎన్నికల్లో చిరంజీవి దెబ్బ తీసిన కన్నా ఘోరంగా వైయస్ జగన్‌ను ఈసారి చంద్రబాబును దెబ్బ తీసే పరిస్థితి ఏర్పడింది. కాంగ్రెసు ఓట్లు జగన్ వల్ల చీలుతాయని భావిస్తున్న చంద్రబాబుకు ఎదురు దెబ్బ తప్పేట్లు లేదు.

Published On May 25, 2011