బస్సు ప్రమాదంలో 25 మంది మృతి, అస్సాంలో దారుణం

By Pratap

Published: Tuesday, May 31, 2011, 9:44 [IST]

గౌహతి: అస్సాంలో జరిగిన ఘోర రోడ్డు ప్రమాదంలో 25 మంది మరణించారు. ఐదుగురికి పైగా అదృశ్యమయ్యారు. పెళ్లి బృందం ప్రయాణిస్తున్న బస్సు వంతెనపై నుంచి వాగులో పడిపోవడంతో ఈ ప్రమాదం సంభవించింది. అస్సాంలోని కామరూప్ (రూరల్) జిల్లాలో సోమవారం అర్థరాత్రి ప్రాంతంలో ఈ ప్రమాదం జరిగింది. బస్సు గౌహతి నుంచి తిహు వెళ్తోంది. బస్సులో దాదాపు 40 మంది ప్రయాణికులున్నారు.

హజు - గౌహతి రోడ్డుపై రాజబరీ వద్ద ఈ దుర్ఘటన సంభవించింది. మంగళవారం ఉదయం వరకు ఆరుగురిని కాపాడగలిగారు. వారిని సమీపంలోని నల్బారీ జిల్లా ఆస్పత్రిలో చేర్చారు. సైనికులు, స్థానికుల సహాయంతో బస్సును బయటకు తీశారు. జాడ తెలియకుండా పోయినవారి కోసం గాలింపు చర్యలు చేపట్టారు.

Published On May 31, 2011