నేడో రేపో గవర్నర్‌కు రాజీనామా ఇవ్వనున్న జూపల్లి కృష్ణారావు

By Srinivas

Published: Tuesday, May 31, 2011, 16:16 [IST]

హైదరాబాద్: దేవాదాయ, ధర్మాదాయ శాఖ మంత్రి జూపల్లి కృష్ణారావు తన రాజీనామా పత్రాన్ని గవర్నర్‌కు సమర్పించునున్నారు. ఈ విషయాన్ని ఆయనే విలేకరులతో స్వయంగా వెల్లడించారు. తన రాజీనామాను గవర్నర్‌కు బుధవారం లోపు సమర్పిస్తానని చెప్పారు. రాజీనామా పత్రం సమర్పించడానికి గవర్నర్ నరసింహన్ అపాయింట్‌మెంట్ తాను కోరానని అయితే గవర్నర్ బిజీ షెడ్యూల్ కారణంగా ఆయనను కలవలేక పోయానన్నారు. మంగళవారం సాయంత్రం కానీ, బుధవారం కానీ కలిసి తన రాజీనామా పత్రాన్ని ఆయనకు అందజేస్తానని చెప్పారు. కాగా ఇంతకుముందే ఆయన తన రాజీనామా పత్రాన్ని ముఖ్యమంత్రి కిరణ్ కుమార్ రెడ్డికి సమర్పించారు. అయితే ఆయన లేఖ తనకు అందలేదని కిరణ్ చెబుతూ వస్తున్నారు.

కాగా అంతకుముందు ఉదయం కూడా ఆయన విలేకరులతో మాట్లాడారు. తాను గతంలోనే ముఖ్యమంత్రి కిరణ్ కుమార్ రెడ్డికి రాజీనామా పత్రాన్ని సమర్పించానని అయితే మంత్రులపై ఒత్తిడి పెరుగుతుందనే ముఖ్యమంత్రి తన రాజీనామాను ఆమోదించలేదన్నారు. తన పాదయాత్ర తెలంగాణ కోసమే అన్నారు. ఎమ్మెల్యేలు రాజీనామా చేస్తే తన పాదయాత్ర అవసరం లేదన్నారు. మంత్రుల రాజీనామాతో అధిష్టానం దిగి వస్తుందన్నారు. పాదయాత్ర ప్రజాస్వామ్య హక్కు అన్నారు. తన పాదయాత్రను ఎవరికీ అడ్డుకునే హక్కు లేదని డికె అరుణను ఉద్దేశించి అన్నారు. తెలంగాణ విషయంలో అధిష్టానం తప్పు ఏమీ లేదన్నారు.

Published On May 31, 2011