లోక్‌పాల్ బిల్లుపై ప్రభుత్వం తిరకాసు, అన్నా హజారేకు టోకరా

న్యూఢిల్లీ: లోక్‌పాల్ బిల్లుపై ప్రభుత్వం తిరకాసు పెట్టింది. అన్నా హజారేకు టోకరా ఇచ్చేందుకు సిద్ధపడింది. ప్రధానిని, న్యాయమూర్తులను, పార్లమెంటు సభ్యులను, ఇతర విభాగాల అధికారులను లోక్‌పాల్ బిల్లు పరిధిలోకి తేవడానికి ప్రభుత్వ ప్రతినిధులు నిరాకరించారు. తద్వారా కేంద్ర ప్రభుత్వం తననైజాన్ని చాటుకుంది. అవినీతి నిర్మూలనపై తనకు చిత్తశుద్ధి లేదని నిరూపించుకుంది. ప్రభుత్వ వ్యవస్థల్లో ఊడలు దిగిన అవినీతిని నిర్మూలించడానికి జన్‌ లోక్‌పాల్‌ బిల్లు తేవాలంటూ ఏప్రిల్లో అన్నాహజారే చేపట్టిన నిరవధిక నిరాహారదీక్షకు జడిసి యుద్ధ ప్రాతిపదికన లోక్‌పాల్‌ ముసాయిదా బిల్లు రూపకల్పనకు సంయుక్త కమిటీని వేసిన కేంద్ర ప్రభుత్వం క్రమంగా దాన్ని నిర్వీర్యం చేయడం ప్రారంభించింది.

సోమవారం ముసాయిదా కమిటీ సమావేశంలో పౌర సమాజ సభ్యులు చేసిన కీలక ప్రతిపాదనలన్నీ తోసిపుచ్చింది. పైగా, ఆ ప్రతిపాదనలపై రాజకీయ పార్టీలు, రాష్ట్ర ప్రభుత్వాల అభిప్రాయం కోరుతూ లేఖలు రాయాలని నిర్ణయించింది. సమావేశం అనంతరం అన్నాహజారే సహా పౌర సమాజ సభ్యులు కేంద్ర ప్రభుత్వ చిత్తశుద్ధిపై అనుమానాలు వ్యక్తం చేశారు. ''మరో దేశవ్యాప్త ఉద్యమానికి సిద్ధంగా ఉండాలి. మరికొన్ని భేటీల వరకు వేచిచూస్తాం. ప్రభుత్వాన్ని ఒప్పించేందుకు చేతనైనంత మేరకు ప్రయత్నిస్తాం. అంగీకరించకపోతే వీధులకు ఎక్కుతాం'' అని పౌర సమాజ సభ్యులు రెండు పుటల ఘాటైన ప్రకటనలో ప్రభుత్వాన్ని హెచ్చరించారు. ప్రభుత్వానికి తాము పెట్టిన జూన్‌ 30 గడువులోగా ముసాయిదా రచన పూర్తవుతుందన్న నమ్మకం కలగడం లేదని హజారే చెప్పారు. ప్రభుత్వం తమ ప్రతిపాదనలను వ్యతిరేక దృష్టితో చూస్తోందని, శత్రుభావంతో వ్యవహరిస్తోందని విమర్శించారు.

English summary

Sharp differences surfaced on Monday between the government and civil society members in 5th joint drafting committee meeting for Lokpal Bill, with the government strongly opposing demands to bring the Prime Minister, higher judiciary and MPs' corrupt acts inside the Parliament, under the ambit of Lokpal.