తెలంగాణ టిడిపి నేతలకు నాకు పట్టిన గతే: నాగం జనార్దన్ రెడ్డి

By Srinivas

Published: Tuesday, May 31, 2011, 12:48 [IST]

హైదరాబాద్: తెలుగుదేశం పార్టీలో ఉంటూ తెలంగాణ అంటూ ఉద్యమం చేస్తే తెలంగాణ తెలుగుదేశం పార్టీ నేతలకు ముందు ముందు తనకు పట్టిన గతే పడుతుందని టిడిపి బహిష్కత శాసనసభ్యుడు నాగం జనార్దన్ రెడ్డి మంగళవారం అన్నారు. నాగం ఉస్మానియా విశ్వవిద్యాలయం విద్యార్థులు తనను తరిమిన విషయాన్ని గుర్తు చేసుకొని తెలుగుదేశం పార్టీ ప్రజాప్రతినిధులను హెచ్చరించినట్లుగా కనిపిస్తోంది. తెలుగుదేశం పార్టీ రణబేరీ సభల పేరుతో తెలంగాణ వాదుల్ని ఇబ్బందులకు గురి చేస్తుందని ఆరోపించారు.

30వ మహానాడులో పార్టీ అధినేత చంద్రబాబునాయుడు తన మనసులోని మాటను బయట పెట్టారన్నారు. ఆయన సమైక్యవాది అని మరోసారి బయట పడిందన్నారు. కేంద్రం ఏ నిర్ణయం తీసుకున్నా తనకు అభ్యంతరం లేదన్న చంద్రబాబు గత డిసెంబర్ 9న కేంద్రం తీసుకున్న నిర్ణయంపై ఒక్కరోజులో ఎందుకు విభేదించారని ప్రశ్నించారు. తెలంగాణ అంశం మా చేతుల్లో లేదన్న తెలుగుదేశం పార్టీని తెలంగాణలో ఎవరూ పట్టించుకోవడం లేదన్నారు. తెలంగాణపై ఇప్పటికే స్పష్టత ఇచ్చామని చెబుతున్న బాబు శ్రీకృష్ణ కమిటీకి పార్టీ విధానం ఏమిటో తెలియజేయలేదన్నారు.

Published On May 31, 2011