సిఎల్‌పి నుంచి పార్టీ ఎమ్మెల్యేలకు ఫోన్లు, శనివారం స్పీకర్ ఎన్నిక

By Pratap

Published: Thursday, June 2, 2011, 16:33 [IST]

హైదరాబాద్: ఈ నెల 4వ తేదీ శనివారం ఉదయం 9 గంటలకల్లా శాసనసభలో అందుబాటులో ఉండాలని కాంగ్రెసు లెజిస్లేటర్ పార్టీ (సిఎల్‌పి) కార్యాలయం నుంచి పార్టీ శాసనసభ్యులకు, ఎమ్మెల్సీలకు ఫోన్లు వెళ్లాయి. స్పీకర్ ఎన్నిక కోసం శనివారం ఉదయం 11 గంటలకు శాసనసభ సమావేశం కానుంది. శాసనమండలి చైర్మన్ ఎన్నిక శనివారం సాయంత్రం 4 గంటలకు జరుగుతుంది. మండలి చైర్మన్‌గా చక్రపాణి పేరు దాదాపుగా ఖరారైంది. శానససభ స్పీకర్ ఎన్నికకు సహకరించాలని శాసనసభా వ్యవహారాల మంత్రి శ్రీధర్ బాబు ప్రతిపక్షాలను కోరారు. అయితే, స్పీకర్ పదవికి తెలుగుదేశం పార్టీ పోటీకి దిగబోతోంది.

అవిశ్వాస తీర్మానం ప్రతిపాదిస్తూ తెలుగుదేశం పార్టీ ఇచ్చిన నోటీసుపై డిప్యూటీ స్పీకర్ నాదెండ్ల మనోహర్ ఇప్పటి వరకు తన నిర్ణయాన్ని ప్రకటించలేదు. స్పీకర్ పదవికి కాంగ్రెసు నుంచి నాదెండ్ల మనోహర్ పోటీకి దిగనున్నారు. డిప్యూటీ స్పీకర్ పదవికి గీతా రెడ్డితో పాటు ఉత్తమ్ కుమార్ రెడ్డి, గీతా రెడ్డి రేసులో ఉన్నట్లు తెలుస్తోంది.

Published On June 2, 2011