ఇసి నోటీసుతో కదిలిన చంద్రబాబు: పాత కార్యవర్గానికే ఓటు

By Pratap

Published: Thursday, June 9, 2011, 10:19 [IST]

హైదరాబాద్: కేంద్ర ఎన్నికల కమిషన్ నోటీసుతో తెలుగుదేశం పార్టీ అధ్యక్షుడు నారా చంద్రబాబు నాయుడిలో కదలిక వచ్చింది. ఎన్నికల కమిషన్‌కు పంపడానికి వీలుగా ఆయన కార్యవర్గాన్ని ఏర్పాటు చేస్తున్నారు. అయితే పాత కార్యవర్గాన్నే కొనసాగించాలనే ఉద్దేశంతో ఆయన ఉన్నట్లు తెలుస్తోంది. గత మహానాడు తర్వాత కొత్త కార్యవర్గాన్ని ఏర్పాటు చేయాల్సి ఉంది. కానీ, దాన్ని ఆయన ఏర్పాటు చేయలేకపోయారు. తాత్కాలిక కమిటీని మాత్రమే వేశారు. ఆ కమిటీనే ఈ ఏడాది కూడా కొనసాగించాలని ఆయన నిర్ణయించుకున్నారు.

పార్టీ పోలిట్‌బ్యూరోలో మాత్రం ఖాళీలను భర్తీ చేయాలని భావిస్తున్నారు. నాగం జనార్దన్ రెడ్డిని సస్పెండ్ చేయడంతో ఆయన స్థానం ఖాళీగా ఉంది. గత ఎన్నికల్లో మల్కాజిగిరి పార్లమెంటు స్థానం నుంచి పోటీ చేసిన భీమ్‌సేన్ అసలు పార్టీ సమావేశాలకు రావడం లేదు. దీంతో ఈ రెండు స్థానాలను వేరే నాయకులతో భర్తీ చేయాలని ఆయన భావిస్తున్నారు. వీరిద్దరి స్థానంలో దేవేందర్ గౌడ్, శ్రీనివాస యాదవ్‌లకు పోలిట్ బ్యూరోలో స్థానాలు దక్కే అవకాశం ఉంది. కాగా, అనుబంధ సంస్థలకు కూడా అధ్యక్షులను నియమిస్తున్నారు.

Published On June 9, 2011