పరిశ్రమల పేరుతో రియల్ వ్యాపారం: టిడిపి అధినేత చంద్రబాబు

హైదరాబాద్: పారిశ్రామిక అవసరాల కోసం ప్రభుత్వం కేటాయించిన భూములను పలు కంపెనీలు రియల్ ఎస్టేట్ వ్యాపారానికి ఉపయోగించుకుంటున్నాయని అయినప్పటికీ ప్రభుత్వం పట్టించుకోవడం లేదని తెలుగుదేశం పార్టీ అధ్యక్షుడు నారా చంద్రబాబు నాయుడు గురువారం విమర్శించారు. గుంటూరు జిల్లా తాడేపల్లికి చెందిన పలువురు రైతులు చంద్రబాబును కలిసి తమ భూమిని ప్రభుత్వం అక్రమంగా లాక్కుంటుందని, తమవి సాగు భూములని వారు ఫిర్యాదు చేశారు. ఆ భూములు లాక్కుంటే తమ పరిస్థితి దారుణంగా ఉంటుందని వారు బాబు ముందు ఆవేదన వ్యక్తం చేశారు.

దీనికి స్పందించన చంద్రబాబు తాడేపల్లిలో రైతుల పంట భూములను తీసుకుంటామని ప్రభుత్వం జారీ చేసిన నోటిఫికేషన్‌ను రద్దు చేయాలని ప్రభుత్వాన్ని హెచ్చరించారు. ఆ భూములను డీనోటిఫై చేయాలని సూచించారు. సాగు భూములను సేకరించడం సరికాదని ఆయన ప్రభుత్వానికి హితవు పలికారు. పారిశ్రామిక అవసరాల పేరిట సేకరించిన భూమిని రియల్ వ్యాపారాలకు ఉపయోగించుకుంటున్నందున ఇలాంటి అక్రమాలు జరగకుండా ఉండటానికి భూసేకరణ చట్టంలో మార్పులు తేవాలని చంద్రబాబు అభిప్రాయపడ్డారు.

English summary

TDP chief Nara Chandrababu Naidu blamed congress government for land allocation. He suggested government to change in land allocation ordinance.