పిసిసి చీప్ బొత్సకు మావోల నుండి ముప్పు: ఇంటెలిజెన్స్ హెచ్చరిక

By Srinivas

Published: Thursday, June 9, 2011, 16:51 [IST]

హైదరాబాద్: ప్రదేశ్ కాంగ్రెసు కమిటీ అధ్యక్షుడు, రవాణా శాఖామాత్యులు బొత్స సత్యనారాయణకు, మంత్రి ధర్మాన ప్రసాదరావుకు మావోయిస్టుల నుండి ప్రాణాపాయం ఉన్నట్లుగా ఇంటెలిజెన్స్ వర్గాలు హెచ్చరించింది. ఉత్తరాంధ్ర జిల్లాలకు చెందిన పలువురు నేతలకు మావోయిస్టుల నుండి ప్రాణాపాయం ఉండవచ్చని ఇంటెలిజెన్స్ వర్గాలు హెచ్చరిస్తున్నాయి. మావోయిస్టు ప్రభావిత ప్రాంతంలోని శ్రీకాకుళం జిల్లా మంత్రి అయిన ధర్మానకు, విజయవగరం జిల్లా నేత అయిన బొత్సకు మావోయిస్టుల నుండి ప్రాణాపాయం ఉందని ఇంటెలిజెన్స్ వారికి వారం రోజుల క్రితమే లేఖలు కూడా రాశాయి.

ఇటీవల మావోయిస్టులు దెబ్బతిన్న నేపథ్యంలో వారి నుండి ముప్పు ఉండవచ్చని ఇంటెలిజెన్స్ హెచ్చరించింది. బొత్సకు, ధర్మానకే కాకుండా మావోయిస్టు ప్రభావిత ప్రాంతంలోని మరో 20 మంది ప్రజాప్రతినిధులకు కూడా ముప్పు ఉన్నట్టుగా ఇంటెలిజెన్స్ హెచ్చరించినట్లుగా తెలుస్తోంది. ఇటీవల మావోయిస్టులు తమ ప్రధాన క్యాడర్‌ను కోల్పోతున్నారు. దీంతో మావోయిస్టులు ప్రతీకారం తీసుకునే యోచనలో ఉండవచ్చని వారు హెచ్చరిస్తున్నారు. అయితే ఇంటెలిజెన్స్ లేఖపై బొత్స మండిపడ్డట్టుగా తెలుస్తోంది. కేవలం తమకు లేఖ ఇచ్చి చేతులు దులుపుకునే ప్రయత్నాలు పోలీసులు చేస్తున్నారని ఆరోపించినట్లుగా తెలుస్తోంది.

Published On June 9, 2011