తెలంగాణపై కాంగ్రెసు పార్టీ రంగు బయపడింది: రాజీవ్ ప్రతాప్ రూడీ

By Pratap

Published: Sunday, June 12, 2011, 15:36 [IST]

హైదరాబాద్: తెలంగాణపై కాంగ్రెసు రంగు బయటపడిందని బిజెపి నాయకుడు రాజీవ్ ప్రతాప్ రూడీ వ్యాఖ్యానించారు. తెలంగాణ రాష్ట్రం ఇవ్వకూడదనే తన ఉద్దేశ్యాన్ని కాంగ్రెసు బయటపెట్టుకుందని ఆయన ఆదివారం మీడియా ప్రతినిధుల సమావేశంలో అన్నారు. కేంద్ర మంత్రి ఎస్ జైపాల్ రెడ్డి వ్యాఖ్యల ద్వారా ఆ విషయం బయటపడిందని ఆయన అన్నారు. తెలంగాణకు వ్యతిరేకంగా జైపాల్ రెడ్డి ప్రకటన చేయడం దురదృష్టకరమని ఆయన అన్నారు. ఆ విధమైన ప్రకటన చేయడం జైపాల్ రెడ్డి స్థాయికి తగింది కాదని ఆయన అన్నారు.

తెలంగాణకు తాము అనుకూలంగా ఉన్నామని, పార్లమెంటులో బిల్లు పెడితే మద్దతిస్తామని ఆయన చెప్పారు. కాంగ్రెసు ప్రభుత్వానికి ప్రజాస్వామ్యంపై నమ్మకం లేదని, ప్రతిపక్షాలను విశ్వాసంలోకి తీసుకునే వైఖరి లేదని ఆయన అన్నారు. కాంగ్రెసు పార్టీ కుంభకోణాల్లో కూరుకుపోయిందని ఆయన విమర్శించారు. మిడ్డే జర్నలిస్టు హత్యను ఆయన ఖండించారు. జర్నలిస్టును హత్య చేసినవారిని కఠినంగా శిక్షించాలని ఆయన డిమాండ్ చేశారు.

Published On June 12, 2011