కృష్ణా జిల్లాలో భార్యను నరికిన భర్త, అనుమానంతోనే ఘాతుకం

విజయవాడ: కృష్ణా జిల్లాలోని కంకిపాడులో సోమవారం తెల్లవారుజామున దారుణ సంఘటన చోటు చేసుకుంది. ఓ భర్త తన భార్యను కత్తితో నరికి హత్య చేయడానికి ప్రయత్నించాడు. తీవ్రంగా గాయపడిన భార్యను ఆస్పత్రిలో చేర్చారు. ఆమె పరిస్థితి ఆందోళనకరంగా ఉంది. శివాజీ అనే వ్యకితో రత్న అనే మహిళకు మూడేళ్ల క్రితం పెళ్లయింది. అతను ఆమెను అనుమానిస్తూ వచ్చాడు. దీంతో భార్యాభర్తలకు మధ్య ఎప్పుడూ గొడవలు జరుగుతుండేవి. పోలీసులు అతనికి కౌన్సెలింగ్ కూడా చేశారు. అయినా ఫలితం లేకుండా పోయింది.

సోమవారం తెల్లవారు జామున భార్యాభర్తలిద్దరు రెల్లు గడ్డి కోయడానికి పొలాలకు వెళ్లారు. రత్న గడ్డి కోస్తుండగా శివాజీ ఆమె తలపై తీవ్రంగా కొట్టాడు. ఆ తర్వాత కత్తితో కడుపులో పొడిచాడు. దాంతో ఆమె రక్తం మడుగులో పడిపోయింది. శివాజీ పారిపోయాడు. అతని కోసం పోలీసులు గాలిస్తున్నారు.

English summary

A person attempted to murder his wife Ratna. The incident took place at Kankipadu of Krishna district.