హైదరాబాద్ తెలంగాణలో అంతర్భాగమే: సిపిఐ నేత ఎబి బర్దన్

By Pratap

Published: Thursday, June 16, 2011, 9:09 [IST]

హైదరాబాద్: తెలంగాణ విషయంలో కాంగ్రెస్‌ ప్రభుత్వం ఎన్ని కుయుక్తులు పన్నినా అంతిమ విజయం ప్రజలదేనని సీపీఐ జాతీయ ప్రధాన కార్యదర్శి ఏబీ బర్దన్‌ అన్నారు. హైదరాబాద్‌ అంశాన్ని ఆయుధంగా చేసుకొని ఉద్యమాన్ని పక్కదారి పట్టించే ప్రయత్నాలు చేస్తున్నారని హెచ్చరించారు. హైదరాబాద్‌ తెలంగాణలో అంతర్భాగమేనని స్పష్టం చేశారు. ప్రత్యేక రాష్ట్రం విషయమై నియమించిన జస్టిస్‌ శ్రీకృష్ణ కమిటీ మరిన్ని సమస్యలు సృష్టించిందని విమర్శించారు. బుధవారం హైదరాబాద్‌లోని నిజాం కళాశాల మైదానంలో సీపీఐ రాష్ట్రశాఖ నిర్వహించిన 'ప్రజాపోరు సభ'లో ఆయన ముఖ్యఅతిథిగా ప్రసంగించారు.

తెలంగాణ అభివృద్ధిని కాంక్షిస్తూ గతంలో తమ పార్టీ విశాలాంధ్రకు మద్దతు పలికినా సమైక్యాంధ్రలో తెలంగాణకు అన్యాయమే జరిగిందని అభిప్రాయపడ్డారు. ''వ్యవస్థాగత లోపాలు, ప్రస్తుత ఉద్యమాలను గమనంలోకి తీసుకున్న తర్వాత పార్టీ జాతీయ సమితి ప్రత్యేక రాష్ట్రం కోసం పోరాడాలని తమ పార్టీ నిర్ణయించింది'' అని అన్నారు. తెలంగాణ ప్రాంతానికి జరుగుతున్న అన్యాయాలపైన, ప్రభుత్వం అనుసరిస్తున్న తప్పుడు విధానాలపైనే సీపీఐ పోరాటం సాగిస్తోంది. అంతేకాని ఆంధ్ర, రాయలసీమ ప్రజలకు వ్యతిరేకంగా మాత్రం కాదని తెలిపారు. ఆ ప్రాంతాల ప్రజలు కూడా అనేక విధాలుగా దోపిడీకి గురవుతున్నారని చెప్పారు. 'కమ్యూనిస్టు పార్టీ అంటేనే తెలంగాణ, తెలంగాణ అంటే కమ్యూనిస్టు పార్టీ' అని వ్యాఖ్యానించారు.

Published On June 16, 2011