అధిష్టానం స్పందించకుంటే బిగ్ ఫైట్!: ఎంపి గుత్తా సుఖేందర్ రెడ్డి

By Srinivas

Published: Friday, June 24, 2011, 14:56 [IST]

హైదరాబాద్: ప్రత్యేక తెలంగాణ రాష్ట్ర ఏర్పాటుపై పార్టీ అధిష్టానం జూలై 1 తేదిలోగా సానుకూల నిర్ణయం తీసుకోకుంటే ఉద్యమాన్ని ఉదృతం చేస్తామని తెలంగాణ తెలంగాణ కాంగ్రెసు పార్లమెంటు సభ్యుడు గుత్తా సుఖేందర్ రెడ్డి శుక్రవారం స్పష్టం చేశారు. శుక్రవారం పెద్దపల్లి ఎంపి వివేక్ నివాసంలో టి-కాంగ్రెసు ఎంపీలు సమావేశం అయ్యారు. భవిష్యత్తు కార్యాచరణ, పార్టీ అధిష్టానంపై తెలంగాణ కోసం ఎలా ఒత్తిడి తీసుకు రావాలనే అంశంపై చర్చించారు. అనంతరం ఎంపి గుత్తా మీడియా ప్రతినిధులతో మాట్లాడారు. తెలంగాణకు అనుకూలంగా నిర్ణయం తీసుకుంటుందని పార్టీపై తమకు నమ్మకం ఉందని అన్నారు.

ఒకవేళ జులై 1లోపు నిర్ణయం తీసుకోకుంటే ఆ రోజు మరోసారి సమావేశం అవుతామని, అనంతరం భవిష్యత్ కార్యాచరణను ప్రకటిస్తామన్నారు. తెలంగాణ ప్రాంత ప్రజాప్రతినిధులంతా సమైక్యంగా పోరాడాలని పిలుపునిచ్చారు. తెలంగాణలోని క్షేత్రస్థాయి పరిస్థితులను సోనియాగాంధీకి ఇప్పటికే తెలియజేశామని చెప్పారు. తెలంగాణ కోరుకునే వారు ఏ పార్టీ నేతలు అయినా వారిపై దాడులు సరికావని గుత్తా సూచించారు. సమైక్యవాదలకు నచ్చజెప్పి తెలంగాణ రాష్ట్రం సాధించుకుందామని చెప్పారు.

Published On June 24, 2011