టిఆర్ఎస్ ఉద్యమం పేరుతో రెచ్చగొడుతోంది: శైలజానాథ్

By Srinivas

Published: Tuesday, June 28, 2011, 15:24 [IST]

హైదరాబాద్: తెలంగాణ రాష్ట్ర సమితి పార్టీ అధికార కాంక్షతోనే తెలంగాణ ఉద్యమం అంటూ అమాయకులను రెచ్చగొడుతుందని మంత్రి సాకె శైలజానాథ్ మంగళవారం అన్నారు. తెలంగాణ రాష్ట్ర సమితి అధ్యక్షుడు కె.చంద్రశేఖరరావు చెప్పేదొకటి చేసేదొకటి అన్నారు. తెలంగాణ ప్రాంతానికి చెందిన దివంగత ప్రధాన మంత్రి పివి నరసింహారావుకు నివాళులు కూడా టిఆర్ఎస్ అర్పించక పోవడం విచారకరమన్నారు. టిఆర్ఎస్ ఉద్యమం పేరుతో సీమాంధ్రులను, ప్రభుత్వాలను హెచ్చరిస్తున్నారని ఆరోపించారు.

శ్రీకృష్ణ కమిటీ రిపోర్టుపై వెంటనే చర్యలు తీసుకోవాలని అధిష్టానాన్ని కోరుతామని శైలజానాథ్ చెప్పారు. తెలంగాణ ప్రాంతా కాంగ్రెసు ప్రజా ప్రతినిధుల హెచ్చరికలను ఒక కుటుంబ వ్యవహారంగా పరిగణిస్తామని అన్నారు. సమైక్యాంధ్రనే ఉంచాలని సీమాంధ్ర నేతలం అందరం కలిసి అధిష్టానానికి నివేదిక ఇస్తామని చెప్పారు. వచ్చే నెల 5, 6 తేదీల్లో ఢిల్లీ వెళతామని చెప్పారు. ప్రధాని అపాయింట్‌మెంట్ కూడా కోరుతామని చెప్పారు.

Published On June 28, 2011