తెలంగాణ నేతలను కాంగ్రెసు హైకమాండ్ రెచ్చగొట్టిందా?

By Pratap

Published: Monday, July 4, 2011, 20:01 [IST]

న్యూఢిల్లీ: తెలంగాణ ప్రజాప్రతినిధులను కాంగ్రెసు అధిష్టానం రెచ్చగొట్టిందనే అభిప్రాయం వ్యక్తమవుతోంది. రెచ్చగొట్టమే కాదు, అవమానించిందని కూడా భావిస్తున్నారు. తెలంగాణ ప్రజా ప్రతినిధులు ఇదే భావనతో ఉన్నారు. కాంగ్రెసు నిజామాబాద్ పార్లమెంటు సభ్యుడు మధు యాష్కీ ఇదే అభిప్రాయాన్ని వ్యక్తం చేశారు. తెలంగాణ ప్రజాప్రతినిధులు రాజీనామాలు చేయాలని నిర్ణయించుకున్నప్పుడు రాష్ట్ర పార్టీ వ్యవహారాల ఇంచార్జీ గులాం నబీ ఆజాద్ హైదరాబాదులో ఉన్నారని, రాజీనామాల నిర్ణయంపై ఆజాద్ చేసిన ప్రకటన రెచ్చగొట్టే విధంగా, అవమానించే విధంగా ఉందని ఆయన అన్నారు. 2004 ఎన్నికల్లో తెలంగాణ రాష్ట్ర సమితి (తెరాస)తో పొత్తు పెట్టుకున్నది ఆజాద్ నాయకత్వంలోనే అని, తెలంగాణ అంశాన్ని రాష్ట్రపతి ప్రసంగంలో చేర్చినప్పుడు పార్లమెంటరీ వ్యవహారాల మంత్రిగా ఆయనే ఉన్నారని యాష్కీ అన్నారు.

తెలంగాణపై నిర్ణయం తీసుకోవడంలో జాప్యం చేయడం ద్వారా, తెలంగాణ నాయకులను మేనేజ్ చేయడం ద్వారా తెలంగాణ ఉద్యమాన్ని నీరు గార్చవచ్చునని కేంద్ర హోం శాఖ నివేదిక ఇచ్చిందని, ఈ రకంగా తప్పుడు నివేదికలు సమర్పించారని ఆయన అన్నారు. కేంద్ర హోం మంత్రి చిదంబరం సోమవారంనాటి మాటలు కూడా కాంగ్రెసు తెలంగాణ ప్రజాప్రతినిధుల రాజీనామాలను తేలికగా తీసుకున్నట్లే ఉన్నాయి. రాజీనామాలు ఆశ్చర్యకరం కాదని ఆయన అన్నారు. దీనిపై కూడా తెలంగాణ కాంగ్రెసు పార్లమెంటు సభ్యులు తీవ్రంగా మండిపడ్డారు. కె. కేశవ రావు, మందా జగన్నాథం వంటి పార్లమెంటు సభ్యులు చిదంబరంపై తీవ్ర వ్యాఖ్యలు చేశారు.

పైగా, ప్రజలకే కాకుండా, కాంగ్రెసు అధిష్టానానికి కూడా తెలంగాణ ప్రజాప్రతినిధులు మాటలపై నిలబడతారనే నమ్మకం లేదు. రాజీనామాలు చేసినప్పటికీ వారు వెనక్కి తగ్గుతారని కాంగ్రెసు అధిష్టానం పెద్దలు అనుకుంటున్నట్లు అర్థమవుతోంది. రాజీనామాలు ఆమోదం పొందకుండా ఆపేసి, తెలంగాణ ప్రజాప్రతినిధులను బుజ్జగించవచ్చునని ఇప్పటికీ వారు భావిస్తున్నట్లు తెలుస్తోంది. అయితే, తెలంగాణ ప్రజాప్రతినిధులు కొద్ది మంది వెనక్కి తగ్గినా మెజారిటీ తగ్గే అవకాశాలు లేవని అంటున్నారు. తమపై ఉన్న చులకనభావాన్ని వారు తీవ్రంగా పరిగణిస్తున్నట్లు అర్థమవుతోంది. అలాగే, తెలంగాణ ప్రజల్లో విశ్వాసం పాదుకొల్పుకోవడానికి రాజీనామాలకు కట్టుబడి ఉండడమే మార్గమని వారు అనుకుంటున్నట్లు కూడా తెలుస్తోంది.

సీమాంధ్ర నాయకులకు పార్టీ అధిష్టానం ఎక్కువ ప్రాధాన్యం ఇస్తూ తమను వివక్షకు గురిచేస్తోందనే అభిప్రాయం కూడా బలంగానే ఉంది. పైగా, రాజీనామాలు చేయకపోయినా ఇప్పుడు పెద్దగా పదవులు వచ్చే అవకాశాలు కూడా లేవు. కొంత మంది మంత్రి పదవులు పోయే పరిస్థితి కూడా ఉంది. ఈ స్థితిలో రాష్ట్ర కాంగ్రెసు పార్టీ వ్యవహారాలను చక్కదిద్దే అవకాశం ఇవ్వడం వల్ల నష్టపోతామనే అభిప్రాయం కూడా వారిలో ఉంది. వైయస్సార్ కాంగ్రెసు పార్టీ వైపు వెళ్లే ప్రజాప్రతినిధులు కూడా ఇందులో ఉన్నారు. దానివల్ల తెలంగాణ ప్రజాప్రతినిధులను మేనేజ్ చేయడం కాంగ్రెసు అధిష్టానానికి అంత సులభం కాదు.

Published On July 4, 2011