తెలంగాణపై ఆజాద్ పాత పాటే, నష్టం లేదని వ్యాఖ్య

By Pratap

Published: Tuesday, July 5, 2011, 15:42 [IST]

న్యూఢిల్లీ‌: తెలంగాణ ప్రజాప్రతినిధుల రాజీనామాల పరంపర కొనసాగుతున్నప్పటికీ కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ పాత పాటే పాడారు. తెలంగాణ సమస్య జఠిలమైందని, సున్నితమైందని, దానిపై విస్తృత స్థాయి చర్చలు జరపాల్సి ఉందని, అందుకు కొంత సమయం పడుతుందని ఆయన అన్నారు. తెలంగాణ మంత్రులు, పార్లమెంటు సభ్యులతో చర్చలు జరిపిన తర్వాత మంగళవారంనాడు ఆయన ప్రధాని మన్మోహన్ సింగ్, పార్టీ అధ్యక్షురాలు సోనియా గాంధీలకు వివరించారు. ఆ తర్వాత ఆయన జాతీయ మీడియాతో మాట్లాడారు. మంత్రి జానారెడ్డి తదితరులతో చర్చలు సామరస్యవూర్వకంగానే జరిగాయని, అయితే చర్చలు కొలిక్కి రాలేదని ఆయన అన్నారు.

విస్తృత స్థాయి సంప్రదింపులను వెంటనే ప్రారంభించాలని తెలంగాణ ప్రజాప్రతినిధులు కోరినట్లు ఆయన తెలిపారు. తెలంగాణ ప్రజాప్రతినిధుల రాజీనామాల వల్ల నష్టమేమీ లేదని ఆయన చెప్పారు. పార్లమెంటు సభ్యుల రాజీనామాల వల్ల యుపిఎ ప్రభుత్వానికి ఏ విధమైన నష్టం జరగదని ఆయన అన్నారు. తెలంగాణ ప్రజాప్రతినిధులతో చర్చలు జరుపుతున్నామని ఆయన చెప్పారు. తెలంగాణ ప్రజాప్రతినిధులతో చర్చలు కొనసాగుతాయని ఆయన అన్నారు. తెలంగాణ సమస్య పరిష్కారానికి మూడు ప్రాంతాల ప్రజల అభిప్రాయం తెలుసుకోవాల్సి ఉంటుందని ఆయన అన్నారు.

Published On July 5, 2011