సీమాంధ్రులతో కలిసి ఢిల్లీ వెళ్లను: మంత్రి డిఎల్

By Srinivas

Published: Thursday, July 7, 2011, 15:52 [IST]

హైదరాబాద్: సమైక్యాంధ్ర కోసం తాను సీమాంధ్ర ప్రజా ప్రతినిధులతో కలిసి న్యూఢిల్లీ వెళ్లనని ప్రాథమిక ఆరోగ్య శాఖ మంత్రి డిఎల్ రవీంద్రా రెడ్డి గురువారం స్పష్టం చేశారు. తెలంగాణ రాష్ట్రంపై కాంగ్రెసు పార్టీ అధిష్టానానిదే తుది నిర్ణయమని అన్నారు. అధిష్టానం ఏ నిర్ణయం తీసుకున్నా తాము సిద్ధంగా ఉన్నామని చెప్పారు. తెలంగాణ అంశంపై కేంద్రం త్వరగా నిర్ణయం తీసుకోవాలని ఆయన ఆకాంక్షించారు. మంత్రులు రాజీనామా చేసినా ఏమీ కాదన్నారు. మంత్రులు లేకున్నా పాలన స్తంభించదన్నారు. దివంగత ముఖ్యమంత్రి వైయస్ రాజశేఖర రెడ్డి మృతి అనంతరం రాష్ట్రంలో పాలన స్తంభించిందన్నారు. కాగా ఈ నెల 9వ తేదిన విశాఖపట్నంలో తన పర్యటన ఉంటుందని డిఎల్ చెప్పారు.

కాగా 2014 వరకు రాష్ట్ర ప్రభుత్వానికి ఎలాంటి ఢోకా లేదని మంత్రి రఘువీరారెడ్డి తిరుపతిలో అన్నారు. ప్రభుత్వాన్ని పడగొట్టే కుట్ర జరుగుతుందని ఆయన ఆరోపించారు. అయినప్పటికీ ప్రభుత్వానికి ఎలాంటి ఇబ్బంది లేదన్నారు. రాష్ట్రపతి పాలన వచ్చే అవకాశం లేదన్నారు. ప్రజాప్రతినిధుల రాజీనామాల వల్ల ప్రజలకు ఇబ్బందులు పడుతున్నారన్నారు. మంత్రులెవరూ రాజీనామా చేయలేదన్నారు.

Published On July 7, 2011