సిఎంకు రంగారెడ్డి జిల్లా కాంగ్రెసు క్యాడర్ షాక్

By Pratap

Published: Saturday, July 9, 2011, 9:49 [IST]

హైదరాబాద్: ముఖ్యమంత్రి కిరణ్ కుమార్ రెడ్డికి షాక్ ఇవ్వాలని రంగారెడ్డి జిల్లా కాంగ్రెసు పార్టీ కార్యకర్తలు నిర్ణయించుకున్నారు. ముఖ్యమంత్రి కార్యక్రమాన్ని బహిష్కరించాలని వారు నిర్ణయించుకున్నారు. ముఖ్యమంత్రి శనివారం రంగారెడ్డి జిల్లా మేడిపల్లి గ్రామంలో వనమహోత్సవ కార్యక్రమంలో పాల్గొననున్నారు. ఈ సందర్భంగా ఆయన మొక్కలు నాటుతారు. అయితే, ఈ కార్యక్రమానికి హాజరు కాకూడదని కాంగ్రెసు కార్యకర్తలు నిర్ణయించుకున్నారు. తెలంగాణ ఉద్యమ నేపథ్యంలో వారు ఈ నిర్ణయానికి వచ్చారు.

కాగా, జిల్లా మంత్రి సబితా ఇంద్రారెడ్డి, ఇంచార్జీ మంత్రి శ్రీధర్ బాబు కూడా ఈ కార్యక్రమానికి హాజరయ్యే అవకాశాలు లేవని అంటున్నారు. తెలంగాణ కోసం రాజీనామాలు చేయడంతో తెలంగాణవాదుల ఆగ్రహాన్ని చవి చూడాల్సి వస్తుందనే ఉద్దేశంతో ఈ కార్యక్రమానికి హాజరు కాకూడదని మంత్రులు నిర్ణయించుకున్నట్లు సమాచారం. ఇదిలా వుంటే, ముఖ్యమంత్రి కార్యక్రమం నేపథ్యంలో ఆటంకాలు కల్పిస్తారనే ఉద్దేశంతో పోలీసులు పలువురు తెలంగాణవాదులను ముందస్తు చర్యగా అరెస్టు చేశారు. వారిని ఘట్కేసర్ పోలీసు స్టేషన్‌కు తరలించారు.

Published On July 9, 2011