వైయస్ జగన్ మరో నవాబు: నిప్పులు చెరిగిన విహెచ్

హైదరాబాద్‌: వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డిని కాంగ్రెసు సీనియర్ నేత వి. హనుమంతరావు మరో నవాబుగా అభివర్ణించారు. పార్టీ ప్లీనరీలో కాంగ్రెసుపై జగన్ చేసిన వ్యాఖ్యలపై ఆయన శనివారం మీడియా ప్రతినిధుల సమావేశంలో నిప్పులు చెరిగారు. తాము నవాబును చూశామని, జగన్ మరో నవాబుగా కనిపిస్తున్నాడని ఆయన అన్నారు. లక్షల కోట్ల రూపాయల ఆస్తులు సంపాదించిన ఏకైక ముఖ్యమంత్రి కుమారుడు వైయస్ జగన్ అని ఆయన అన్నారు. రాష్ట్రాన్ని ఎంతో మంది ముఖ్యమంత్రులు పాలించారని, ఏ ముఖ్యమంత్రి కుమారుడు కూడా జగన్‌లా సంపాదించలేదని ఆయన అన్నారు.

వైయస్ జగన్ 365 కోట్ల ముందస్తు పన్ను చెల్లించాడంటే ఆస్తి ఎంత ఉంటుందో అర్థం చేసుకోవచ్చునని, ఇది బయటకు చెప్పిన ఆస్తి అని, చెప్పని ఆస్తి ఎంత ఉందో చెప్పలేమని ఆయన అన్నారు. అప్పుడు కనిపించని అవినీతి మరో పార్టీ పెట్టగానే వైయస్ జగన్‌కు కాంగ్రెసు పార్టీలో అవినీతి కనిపించిందా అని ఆయన అడిగారు. తమ పార్టీ అధ్యక్షురాలు సోనియా గాంధీని జగన్ విమర్శించడాన్ని ఆయన తప్పు పట్టారు. తన భర్త రాజీవ్ గాంధీని చంపినవారిని కూడా క్షమించిన దయాగుణం సోనియాదని ఆయన అన్నారు. వైయస్ జగన్ వ్యవహారమేమిటో తెలంగాణ ప్రజలకు అర్థమైందని ఆయన అన్నారు.

English summary

Congress senior leader V Hanumanth Rao termed YS Jagan as another Nawab.