పునర్వ్యస్థీకరణ సెగ: గురుదాస్ కామత్ రాజీనామా

న్యూఢిల్లీ: ప్రధాని డాక్టర్ మన్మోహన్ సింగ్‌కు మంత్రివర్గ పునర్వ్యస్థీకరణ సెగ తాకింది. తమకు కేటాయించిన శాఖలపై తీవ్ర అసంతృప్తి వ్యక్తం చేస్తూ కాంగ్రెసు నాయకులు శ్రీకాంత్ జెనా, గురుదాస్ కామత్ ప్రమాణ స్వీకార కార్యక్రమానికి హాజరు కాలేదు. 61 ఏళ్ల జెనా ఇప్పటి వరకు రసాయనాలు, ఎరువుల శాఖ సహాయ మంత్రిగా ఉన్నారు. తాజా మార్పుల్లో ప్రధాని ఆయనకు గణాంకాలు, కార్యక్రమాల అమలు సహాయ మంత్రిగా ఇండిపెండెంట్ చార్జీ ఇచ్చారు. తనకు కేబినెట్ హోదా కల్పించకపోవడంపై ఆయన అలిగారు.

జెనా ఒరిస్సా నుంచి నాలుగు సార్లు లోకసభకు ఎన్నికయ్యారు. కేంద్ర మంత్రివర్గంలో ప్రాతినిధ్యం వహిస్తున్న నాయకుడు ఆయనొక్కరే. క్యాబినెట్ హోదా కల్పించకపోవడమే కాకుండా ప్రాధాన్యం లేని శాఖ కేటాయించారని ఆయన అలిగారు. గురుదాస్ కామత్ కూడా తనకు కేటాయించిన శాఖపై తీవ్ర అసంతృప్తితో ఉన్నారు. ఆయనను సహాయ మంత్రిగా తీసుకుని మంచినీరు, పారిశుధ్య శాఖను కేటాయించారు. తనకు కేటాయించిన శాఖపై తీవ్ర అసంతృప్తితో ఆయన మంత్రి పదవికి రాజీనామా చేశారు. తన రాజీనామా లేఖను ఆయన ప్రధానికి పంపించారు.

ముంబై నార్త్ ఈస్ట్ నుంచి కామత్ లోకసభకు ఎన్నికయ్యారు. సుబ్రహ్మణ్య స్వామి, ప్రమోద్ మహాజన్ వంటి హేమాహేమీలను ఓడించిన చరిత్ర ఈ 57 ఏళ్ల రాజకీయ నాయకుడికి ఉంది. ఇంతకు ముందు ఆయన సహాయ మంత్రిగా ఐటి, కమ్యూనికేషన్ల శాఖను, హోం అఫైర్స్ శాఖలను నిర్వహించారు.

English summary

Unhappy at the portfolios allocated to them in the cabinet reshuffle, two Congress leaders Srikant Jena and Gurudas Kamat on Tuesday skipped the swearing in ceremony.