సాగాసీదాగా వైయస్ జగన్ పార్టీ కార్యాలయం

హైదరాబాద్: వైయస్సాఆర్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డి తన పార్టీ కేంద్ర కార్యాలయాన్ని హైదరాబాదులోని జూబ్లీహిల్సులో గురువారం సాదాసీదాగా ప్రారంభించారు. దీక్ష, ఓదార్పు తదితర కార్యక్రమాలన్నింటికీ హంగామా చేసే వైయస్ జగన్ తన పార్టీ కార్యాలయాన్ని మాత్రం సాదాసీదాగా ప్రారంభించారు. జూబ్లీహిల్సులోని రోడ్డు నెంబర్ 45లో పార్టీ కేంద్ర కార్యాలయాన్ని ప్రారంభించారు. ఇప్పటి వరకు సాగర్ సొసైటీలోని లోటస్ పౌండ్‌లోని జగన్ ఇంటిలోనే పార్టీ కార్యకలాపాలు జరిగేవి. ఇప్పుడు పార్టీ కార్యాలయం ప్రారంభించడంతో ఇక నుండి పార్టీ కార్యక్రమాలకు ఇది వేదిక కానుంది.

పార్టీ కార్యాలయాన్ని నిరాడంబరంగా మీడియాకు ఎలాంటి సమాచారం తెలియజేయకుండా ప్రారంభించడం విశేషం. పార్టీ కార్యాలయాన్ని మోహన్ రెడ్డి ప్రారంభించినట్లుగా తెలుస్తోంది. కాగా పార్టీ కార్యాలయం ప్రారంభించిన రోజే జగన్ పార్టీ కన్వీనర్‌లు, పార్టీ పరిశీలకులతో సమావేశం అయ్యారు. పార్టీ సభ్యత్వ నమోదుపై సమావేశం నిర్వహించినట్లుగా తెలుస్తోంది. ఈ సమావేశానికి ప్రముఖ మాజీ సినీ హీరోయిన్ రోజా, కాంగ్రెసు పార్టీకి చెందిన జగన్ వర్గం శాసనసభ్యుడితో పాటు పలువురు ప్రముఖులు వచ్చినట్లుగా తెలుస్తోంది.

English summary

YSR Congress party president YS Jaganmohan Reddy started his party office at road number 45 of Jubilee Hills in Hyderabad.