రాజీనామాలపై ఆంధ్ర తెనాలికి తెలంగాణ నాగం

By Srinivas

Published: Tuesday, July 19, 2011, 14:21 [IST]

హైదరాబాద్: తెలుగుదేశం పార్టీ బహిష్కృత శాసనసభ్యుడు నాగం జనార్దన్ రెడ్డి తన రాజీనామాను ఆమోదించాలంటూ బుధవారం స్పీకర్ నాదెండ్ల మనోహర్ నియోజకవర్గం అయిన తెనాలికి వెళ్లనున్నారు. మంగళవారం తమ రాజీనామాలు స్పీకర్ ఆమోదించాలని డిమాండ్ చేస్తూ అసెంబ్లీలోని స్పీకర్ కార్యాలయం ముందు మధ్యాహ్నం బైఠాయించారు. ఈ సందర్భంగా ఆయన మాట్లాడారు. తాము రాజీనామాలు ఆత్మప్రభోదానుసారం చేశామని అన్నారు. రాజీనామాలు ఆమోదించే వరకు తాము వెనక్కి తగ్గేది లేదని అన్నారు. తమ రాజీనామాలు ఆమోదిస్తే వెంటనే ప్రజలలోకి వెళ్లేందుకు మాకు ఆస్కారం ఉంటుందన్నారు. మా రాజీనామాలు ఎంత తొందరగా ఆమోదం చేస్తే అంత మంచిదన్నారు.

కేంద్ర ప్రభుత్వంపై ఒత్తిడి పెంచేందుకే రాజీనామాలు చేశామని అన్నారు. స్పీకర్ ఎవరి ఒత్తిడులకు లొంగకుండా తమ రాజీనామాలు ఆమోదించాలని కోరారు. నాలుగున్నర కోట్ల తెలంగాణ ప్రజల ఆకాంక్ష అయిన ప్రత్యేక రాష్టం కొరకే తాము రాజీనామాలు చేసినట్లు చెప్పారు. మంగళవారం స్పీకర్ వస్తారని చెప్పారని అయితే ఇప్పటి వరకు రాక పోవడంతో తాము బైఠాయించామని చెప్పారు. మంగళవారం రాజీనామాలపై స్పష్టమైన నిర్ణయం రాని పక్షంలో బుధవారం తెనాలి వెళతామని చెప్పారు. కాగా నాగం జనార్దన్ రెడ్డితో పాటు జోగు రామన్న, హరీశ్వర్ రెడ్డి సైతం రాజీనామాలు ఆమోదించాలంటూ బైఠాయించారు. కాగా నాగం వర్గం సిఎస్ సదారంతో భేటీ అయింది.

Published On July 19, 2011