తెలంగాణ బందుకు పిలుపునిచ్చిన జెఏసి

By Srinivas

Published: Thursday, July 21, 2011, 17:38 [IST]

హైదరాబాద్: తెలంగాణ రాజకీయ ఐక్యకార్యాచరణ సమితి శుక్రవారం బందుకు పిలుపునిచ్చింది. అమర వీరుల అంతిమయాత్రను అడ్డుకుంటున్నందుకు, తెలంగాణ ప్రాంతంలో ఉద్యోగుల సమ్మె హక్కును ఎస్మా ప్రయోగంతో కాలరాస్తున్నందుకు నిరసనగా శుక్రవారం బందుకు పిలుపునిచ్చింది. బుధవారం న్యూఢిల్లీలోని పార్లమెంటు భవన్ సమీపంలో తెలంగాణ కోసం ఆత్మహత్య చేసుకున్న యాదిరెడ్డి మృతదేహాన్ని గురువారం ఎపి భవన్‌కు తరలించే విషయంలో తీవ్ర ఉద్రిక్త పరిస్థితులు చోటు చేసుకున్నాయి.

అంతేకాకుండా వచ్చే నెల ఆగస్టు 1 నుండి సకల జనుల సమ్మెపై ప్రభుత్వం ఎస్మా ప్రయోగించేందుకు సిద్ధం కావడంపై సైతం టిజెఏసి బందుకు పిలుపునిచ్చింది. కాగా ఆ తర్వాత వరుసగా తెలంగాణ రాజకీయ ఐక్య కార్యాచరణ సమితి కార్యక్రమాలు ఉన్నాయి. రాజీనామాలు చేయని వారి దిష్టిబొమ్మలు దగ్ధం చేయడం, దుకాణాలలో తెలంగాణ రాష్ట్రం పేరుతో బోర్డులు పెట్టడం వంటి కార్యక్రమాలు ఉన్నాయి. ఈ నెలాఖరులోగా రాజీనామా చేసిన అందరు నేతలతో కలిసి ఢిల్లీకి పరేడ్ కోసం వెళ్లే యోచనలోనూ జెఏసి ఉంది. కాగా శుక్రవారం బందుకు కాంగ్రెసు, తెలుగుదేశం పార్టీతో పాటు పలు ప్రజాసంఘాలు మద్దతు పలుకుతున్నాయి.

Published On July 21, 2011