హైదరాబాద్ నగరం ఏ ఒక్కరి సొత్తు కాదు: కోడెల

By Srinivas

Published: Friday, July 22, 2011, 13:54 [IST]

గుంటూరు: రాష్ట్ర రాజధాని హైదరాబాదు ఏ ఒక్కరి సొత్తు కాదని తెలుగుదేశం పార్టీ సీనియర్ నాయకుడు, మాజీ మంత్రి కోడెల శివప్రసాద్ శుక్రవారం గుంటూరు జిల్లాలో మాట్లాడుతు అన్నారు. హైదరాబాద్ సమైక్యాంధ్ర రాజధాని అని చెప్పారు. భౌతిక దాడులతో భయపెట్టాలని చూస్తే భయపడేది లేదని చెప్పారు. గురువారం ఢిల్లీలోని ఎపి భవనంలో దళిత ఉద్యోగిపై టిఆర్ఎస్ ఎమ్మెల్యే హరీష్ రావు చేసిన దాడిని తాము తీవ్రంగా ఖండిస్తున్నామని అన్నారు.

తెలంగాణ కోసం ఆత్మహత్య చేసుకున్న యాదిరెడ్డి మృతికి చింతిస్తున్నామన్నారు. చట్టాలకు వ్యతిరేకంగా ఎపి భవన్‌లో మృతదేహాన్ని తీసుకు రావాలనుకోవటం సమంజసం కాదని అభిప్రాయపడ్డారు. దాడుల ద్వారా దొరల పెత్తనాన్ని గుర్తు చేస్తున్నారని అన్నారు. దాడులు చేసి క్షమాపణ చెబితే సరిపోదన్నారు. తెలంగాణ నేతలు నిరాశావాదం, నిర్వేదానికి గురై ఈ తరహా దాడులు, బెదిరింపు వాఖ్యలకు పాల్పడుతున్నట్లుగా ఉందన్నారు.

Published On July 22, 2011