చెప్పులు పంపించు, మోస్తా: రెవంత్‌ రెడ్డికి శైలజానాథ్

By Srinivas

Published: Friday, July 22, 2011, 12:48 [IST]

హైదరాబాద్: సమైక్యాంధ్ర అంటున్న సీమాంధ్ర ప్రజాప్రతినిధులు చెప్పులు మోయడానికి సిద్ధంగా ఉన్నారా అన్న తెలుగుదేశం పార్టీ శాసనసభ్యుడు రేవంత్ రెడ్డి వ్యాఖ్యలపై మంత్రి, సమైక్యాంధ్ర కన్వీనర్ శైలజానాథ్ శుక్రవారం స్పందించారు. ఢిల్లీలోని ఎపి భవన్‌లో దళితుడిపై దాడి చేసిన హరీష్ రావు, రేవంత్ రెడ్డిలపై ఆయన ధ్వజమెత్తారు. రేవంత్ రెడ్డి చెప్పులు మోసేందుకు తాను సిద్ధంగా ఉన్నానని చెప్పారు. రేవంత్ రెడ్డి తన పాత చెప్పులు పంపిస్తే తన కారుపై పెట్టుకుని తిరుగుతానని చెప్పారు. తెలంగాణ ప్రాంతంలో దొరల ఆధిపత్యం పెరిగేలా కుట్ర జరుగుతోందన్నారు. తెలంగాణ వాదుల దాడుల కారణంగా సమైక్యాంధ్రగా ఉండాలన్న మా నినాదం మరింత బలపడుతుందని శైలజానాథ్ చెప్పారు.

దళితుడిపై దాడి చేసి హరీష్ రావు దొరతనం చూపించారని అన్నారు. ఏ ఉద్యమం అయినా అహింసాయుత పద్ధతిలో జరగాలని సూచించారు. తెలుగుదేశం పార్టీ నేత పయ్యావుల కేశవ్ ఆత్మాహుతి దాడులు చేస్తామన్న వ్యాఖ్యలను ఖండించారు. ఆత్మాహుతి దాడులు సరికాదన్నారు. ఎపి భవన్ అధికారులు చట్టవిరుద్దంగా ఆదేశాలు ఇస్తే చర్యలకు సిద్ధమని అన్నారు. తెలంగాణ ముసుగులో భూస్వామ్యాన్ని తెర పైకి తీసుకు వస్తున్నారని ఆరోపించారు. ఏడాదిన్నరగా దళితులపై దాడులు తీవ్రమవుతున్నాయన్నారు.

Published On July 22, 2011