పదేళ్లు ఉమ్మడి రాజధానికి సరేనన్న తెలంగాణ కాంగ్రెసు

By Srinivas

Published: Sunday, July 24, 2011, 17:57 [IST]

హైదరాబాద్: తెలంగాణ ప్రాంత కాంగ్రెసు ప్రజాప్రతినిధులు ఓ మెట్టు దిగినట్టుగా కనిపిస్తోంది. ఆదివారం మంత్రి జానారెడ్డి ఇంట్లో సమావేశం సందర్భంగా కరీంనగర్ పార్లమెంటు సభ్యులు వివేక్, వి హనుమంతరావులు హైదరాబాదుపై వెనక్కి తగ్గి మాట్లాడారు. సీమాంధ్ర ప్రజాప్రతినిధులు హైదరాబాదుపై మోజు పడుతున్నారని కాబట్టి పదేళ్లు హైదరాబాదును ఉమ్మడి రాజధానిగా ఉంచేందుకు అంగీకరిస్తామని చెప్పారు. అయితే ప్రత్యేక తెలంగాణ విషయంలో మాత్రం వెనక్కి తగ్గే ప్రసక్తి లేదన్నారు. తెలంగాణ కావాల్సిందే అని చెప్పారు. తెలంగాణ కోసం రాజీనామాలకే కాంగ్రెసు ప్రజా ప్రతినిధులు అందరూ కట్టుబడి ఉన్నారని చెప్పారు. రాజీనామాలపై ఎవరూ వెనక్కి తగ్గరని అన్నారు.

విద్యార్థులు, యువకులు చాలామంది తెలంగాణ కోసం ప్రాణత్యాగం చేస్తున్నారని అన్నారు. వారి త్యాగాలు చూసి అయినా సీమాంధ్ర ప్రజా ప్రతినిధులు రాష్ట్రం విడిపోవడానికి ఒప్పుకోవాలన్నారు. రాష్ట్రం విడిపోతే రెండు రాష్ట్రాలు అభివృద్ధి చెందుతాయని అన్నారు. విడిపోయినా అన్నదమ్ముల్లా కలిసి ఉండవచ్చన్నారు. పదేళ్లు హైదరాబాదును ఉమ్మడి రాజధానిగా ఉంచేందుకు తాము అంగీకరించినందున ఆ తర్వాత వారు ఇక్కడి నుండి వెళ్లి పోవాలని అన్నారు.

Published On July 24, 2011