మధు యాష్కీ అమెరికా వెళ్లడం సరికాదు: నాగం

By Srinivas

Published: Monday, July 25, 2011, 14:38 [IST]

హైదరాబాద్: నిజామాబాద్ పార్లమెంటు సభ్యుడు మధుయాష్కీ పత్రికలలో నాలుగు రోజులు ప్రకటనలు గుప్పించి అమెరికా వెళ్లడం సరికాదని తెలుగుదేశం పార్టీ బహిష్కృత శాసనసభ్యుడు నాగం జనార్దన్ రెడ్డి సోమవారం అసెంబ్లీ వద్ద అన్నారు. సభాపతి నాదెండ్ల మనోహర్‌కు తమ రాజీనామాలు ఒక ప్రకటనతో తిరస్కరించడం సరికాదన్నారు. స్వచ్ఛందంగా ఇచ్చిన తమ రాజీనామాలను తిరస్కరించే అధికారం సభాపతికి లేదన్నారు. తప్పు చేస్తే స్పీకరును ప్రశ్నించే అధికారం ప్రతి పౌరుడికి ఉంటుందన్నారు. తెలంగాణ కోసం జైలుకు వెళ్లడానికైనా తాము సిద్ధంగా ఉన్నామని అన్నారు. తాము ఎవరి ఒత్తిడులకు లొంగి రాజీనామాలు చేయలేదన్నారు. ఒత్తిళ్లకు లొంగింది స్పీకరే అని ఆరోపించారు. స్పీకరు తమ రాజీనామాలు తిరస్కరించి తెలంగాణ ప్రజలను, తమను అవమానపర్చారని ఆరోపించారు.

తెలుగుదేశం, కాంగ్రెసు పార్టీలు ఏం సాధించాయని జెండా పండుగలు చేసుకుంటున్నాయని ప్రశ్నించారు. ఒకసారి రాజీనామాలు చేసిన టిడిపి, కాంగ్రెసు ప్రజాప్రతినిధులు మరోసారి రాజీనామాలు చేయడానికి మల్లగుల్లాలు ఎందుకు పడుతున్నారని ప్రశ్నించారు. మధుయాష్కీకి చిత్తశుద్ధి ఉంటే ఏఐసిసి అధ్యక్షురాలు సోనియాగాంధీ ఇంటి ముందు ఆందోళన చేయాలని డిమాండ్ చేశారు. నాలుగు రోజులు పత్రికలలో ప్రకటనలతో సరిపెట్టి అమెరికా వెళ్లడం సరికాదన్నారు. తెలంగాణ కోసం ప్రజాప్రతినిధులంతా మళ్లీ రాజీనామా చేయాలని డిమాండ్ చేశారు. అంతకుముందు నాగం జనార్దన్ రెడ్డి ఆయన బృందం సీల్డు కవరులో తమ రాజీనామాలు పెట్టి అసెంబ్లీ సెక్రటరీకి ఇచ్చారు.

Published On July 25, 2011