కన్న కూతురిపై కిరోసిన్ పోసి నిప్పంటించిన తల్లి

By Srinivas

Published: Thursday, July 28, 2011, 17:34 [IST]

గుంటూరు: జిల్లాలో ఘోర దుర్ఘటన చోటు చేసుకుంది. గుంటూరు జిల్లాలోని చేకూరు గ్రామంలో ఓ తల్లి కన్న కూతురుపై హత్యా యత్నం చేయడం స్థానికంగా సంచలనం సృష్టించింది. తండ్రి లేని సమయంలో కూతురు సీతామహాలక్ష్మి ఆమె తల్లి కిరోసిన్ పోసి హత్య చేసేందుకు ప్రయత్నించింది. దీంతో ఆమెకు తీవ్ర గాయాలయ్యాయి. స్పందించిన స్థానికులు బాధితురాలిని వెంటనే గుంటూరు జిల్లా ఆసుపత్రికి తరలించారు. వైద్యులు ఆమెకు చికిత్స చేస్తున్నారు. సీతామహాలక్ష్మికి ఇద్దరు అక్కలు ఉన్నారు. వారిద్దరి పెళ్లిళ్లు అయిపోయాయి.

తల్లీ కూతుళ్ల మధ్య గత పది రోజులుగా వివాదం నడుస్తున్నట్టుగా తెలుస్తోంది. కేసు నమోదు చేసుకున్న పోలీసులు వివిధ కోణాల్లో దర్యాఫ్తు చేస్తున్నారు. తల్లీకూతుళ్ల మధ్య ఇంటి లోపల జరిగిన వివాదం చంపే వరకు వచ్చిందంటే ఏదో బలమైన కారణం ఉండి ఉంటుందని అనుమానం వ్యక్తం చేస్తున్నారు. ఏదైనా అక్రమ సంబంధం విషయంలో గొడవ చెలరేగిందా అనే కోణంలోనూ పోలీసులు దర్యాఫ్తు చేస్తున్నారు. కాగా స్థానికులు మాత్రం తల్లికి మతిస్థిమితం లేదని చెబుతున్నట్టు తెలుస్తోంది.

Published On July 28, 2011