2004 నుండి ఓఎంసితో నాకు సంబంధం లేదు: గాలి

బెంగళూరు: తాను ఓబుళాపురం మైనింగ్ కార్పొరేషన్ నుండి ఏడేళ్ల క్రితమే వైదొలిగానని అయినప్పటికీ లోకాయుక్త తనపై తప్పుడు ఆరోపణలు చేసిందని కర్నాటక మంత్రి, గాలి జనార్దన్ రెడ్డి సోదరుడు గాలి కరుణాకర్ రెడ్డి ఓ టీవీతో మాట్లాడుతూ చెప్పారు. లోకాయుక్త సంతోష్ హెగ్డె సమర్పించిన నివేదిక పూర్తి తప్పుల తడక అని చెప్పారు. అందులో వాస్తవాలు లేవన్నారు. తాను 2004లోనే ఓబుళాపురం మైనింగ్ కార్పోరేషన్ నుండి బయటకు వచ్చినప్పటికీ ఆ తర్వాత 2007 నుండి తాను పన్ను ఎగవేసినట్టు నివేదికలో పేర్కొనడం ఎంత వరకు వాస్తవం అన్నారు. దీనిపై గవర్నర్ భరద్వాజ్‌ను కలిసి న్యాయపోరాటం చేస్తానని చెప్పారు.

కాగా అనంతపురం జిల్లాలోని ఓబుళాపురం మైనింగ్ కార్పోరేషన్‌లో భారీగా అక్రమాలు జరిగాయని అనుమతులు లేని తవ్వకాలు జరిగాయని, విదేశాలకు అక్రమంగా ముడి ఇనుము తరలించాలించారని లోకాయుక్త నివేదికలో ఆరోపించారు. అనుమతులు పొందిన భూమి కంటే ఎక్కువగా తవ్వినట్లు కూడా ఆంధ్ర ప్రదేశ్‌లో ప్రతిపక్షాలు ఆరోపించాయి. దీంతో ప్రస్తుత కర్నాటక కుంభకోణం ఆంధ్ర ప్రదేశ్‌పై కూడా పడనుందని పలువురు అభిప్రాయపడుతున్నారు.

English summary

Karnataka minister Gali Karunakar Reddy said today that he has no links with Obulapuram Mining Corporation.