లక్షలాది మందికి టోకరా ఇచ్చిన ఆన్‌లైన్ కంపెనీ

హైదరాబాద్: స్పీక్ ఆసియా అనే ఆన్‌లైన్ కంపెనీ లక్షలాది మందికి టోకరా ఇచ్చింది. దేశవ్యాప్తంగా 19 లక్షల మందిని ఈ కంపెనీ మోసం చేసినట్లు ఆరోపణలున్నాయి. మోసపోయినవారిలో ఆంధ్రప్రదేశ్‌కు చెందిన 40 వేల మంది ఉన్నట్లు అంచనా. దీంతో ఆ కంపెనీ బ్యాంక్ ఖాతాలను సిఐడి అధికారులు స్తంభింపజేశారు. దాదాపు 33 కోట్ల రూపాయల మేరకు కంపెనీ అక్రమాలకు పాల్పడినట్లు సిఐడి పోలీసులకు ఫిర్యాదు అందింది.

సింగపూర్‌కు చెందిన కంపెనీ చీఫ్ ఆపరేటింగ్ ఆఫీసర్ (సిఒఒ) తారక్ బాజ్‌పేయిని ముంబై పోలీసులు ఇండోర్‌లో గురువారం రాత్రి అరెస్టు చేశారు. రూ. 2,100 కోట్ల అక్రమాలకు గాను ఈ అరెస్టు జరిగింది. ఈ కంపెనీపై విజయవాడకు చెందిన ఎన్‌జివో కార్పొరేట్ ఫ్రాడ్ వాచ్ రెండు నెలల క్రితం ఫిర్యాదు చేసింది. పోలీసులు కేసు నమోదు చేశారు. సిఐడి పోలీసులు ఎంఎస్ స్వామి, శ్రీనివాస రెడ్డి అనే ఇద్దరు స్పీక్ ఆసియా ఏజెంట్లను అరెస్టు చేశారు. అయితే, వారి అరెస్టుపై కోర్టు స్టే ఇచ్చింది. తాము స్టే తొలగింపునకు అపీల్ చేశామని సిఐడి అదనపు డిజి ఎస్వీ రమణమూర్తి చెప్పారు.

English summary

CID sleuths have frozen the bank accounts of online survey company Speak Asia, which allegedly duped about 19 lakh people across the country including 40,000 people from the state to the tune of Rs 33 crore by resorting to financial irregularities.