ఎపి భవన్ కేసులో హరీష్‌కు ఢిల్లీ పోలీసు నోటీసులు

By Srinivas

Published: Tuesday, August 2, 2011, 11:44 [IST]

హైదరాబాద్: న్యూఢిల్లీలోని ఆంధ్ర ప్రదేశ్ భవన్‌లో ఉద్యోగి చందర్ రావుపై దాడి కేసులో ఢిల్లీ పోలీసులు తెలంగాణ రాష్ట్ర సమితి శాసనసభ్యులు హరీష్ రావు, ఈటెల రాజేందర్, కల్వకుంట్ల తారక రామారావు, మాజీ పార్లమెంటు సభ్యుడు వినోద్ కుమార్‌లకు నోటీసులు పంపించారు. ఐదు రోజులలో తమ ఎదుట హాజరు కావాలని వారు ఆదేశాలు జారీ చేశారు. వీరిపై రెండు విధాల కేసులు నమోదయినట్లుగా తెలుస్తోంది. ఒకటి దళితుడైన చందర్ రావుపై దాడి చేయడం ఒకటి కాగా, తన తండ్రిపై దాడి చేసే సమయంలో అడ్డుకున్నందుకు తన పట్ల వారు అసభ్యంగా ప్రవర్తించారని చందర్ రావు కూతురు కూడా కేసు పెట్టినట్లుగా తెలుస్తోంది. దీనితో పాటు తెలంగాణ కోసం పార్లమెంటు సమీపంలో ఆత్మహత్య చేసుకున్న యాదిరెడ్డి మృతదేహం తరలింపు విషయంలో చెలరేగిన వివాదంపైనా విచారణ జరుపుతున్నారు.

యాదిరెడ్డి మృతదేహాన్ని ఎపి భవన్‌కు తీసుకు రావడానికి అంగీకరించిన సిబ్బంది ఆ తర్వాత తెలంగాణ ప్రజా ప్రతినిధులకు ఎలాంటి సమాచారం ఇవ్వకుండానే చాటుగా నేరుగా హైదరాబాదు పంపించింది. దీంతో ఆగ్రహం చెందిన సిద్దిపేట శాసనసభ్యుడు హరీష్ రావు నేరుగా ఎపి భవన్‌లోకి వెళ్లి ఉద్యోగి చందర్ రావుపై చేయి చేసుకున్నాడు. ఆ తర్వాత తాను ఆవేశంతో మాత్రమే చేశానని అందుకు తాను చింతిస్తున్నానని కూడా చెప్పారు. కాగా నోటీసులపై టిఆర్ఎస్ఎల్పీ ఈటెల రాజేందర్ స్పందించారు. తమపై ఎస్సీ, ఎస్టీ కేసు పెట్టడం సరికాదన్నారు. అట్రాసిటీ కేసు పెట్టే హక్కు లేదన్నారు. తాము ఎవరినీ కులం పేరుతో దూషించలేదన్నారు. తమను జైలు పాలు చేయడానికే ప్రభుత్వం కంకణం కట్టుకొని ఇలాంటి కేసులు పెట్టిస్తుందని ఆరోపించారు. తాము అక్కడకు వెళ్లిన సమయంలో చందర్ రావు కూతురు లేదని అలాంటప్పుడు ఆమె పట్ల అసభ్యంగా ప్రవర్తించారని కేసు ఎలా పెడతారని ప్రశ్నించారు.

Published On August 2, 2011