చిదంబరం అవమానించారు: పొన్నాల లక్ష్మయ్య

By Srinivas

Published: Tuesday, August 2, 2011, 13:18 [IST]

హైదరాబాద్: 14ఎఫ్ రద్దుపై కేంద్రమంత్రి చిదంబరం చేసిన వ్యాఖ్యల పట్ల ఐటి శాఖ మంత్రి పొన్నాల లక్ష్మయ్య మంగళవారం తీవ్రంగా స్పందించారు. 14ఎఫ్ రద్దు చేయాలంటే మళ్లీ అసెంబ్లీలో తీర్మానం ప్రవేశ పెట్టాలని చిదంబరం వ్యాఖ్యానించడం సరికాదన్నారు. చిదంబరం వ్యాఖ్యలు ప్రజా ప్రతినిధులను, అసెంబ్లీ తీర్మానాన్ని అవమానించడమే అన్నారు. 14ఎఫ్ రద్దుపై మరోసారి తీర్మానం పెట్టాలని చెబితే రాష్ట్ర విలీనం పైనా మరోసారి అసెంబ్లీలో తీర్మానం చేయాలా అని చిదంబరాన్ని ప్రశ్నించారు. 14ఎఫ్ రద్దు చేసే వరకు తాము అసెంబ్లీలో అడుగు పెట్టేది లేదని స్పష్టం చేశారు. చిదంబరం చేసే ఇలాంటి ప్రకటనలు విపరీత పరిణామాలకు దారి తీసే అవకాశం ఉందన్నారు.

తీర్మానం మరోసారి అవసరం లేదని బిసి సంక్షేమ శాఖ మంత్రి బస్వరాజు సారయ్య అభిప్రాయపడ్డారు. మంత్రి జానారెడ్డి నివాసంలో పొన్నాల, బస్వరాజు సారయ్య భేటీ అయ్యారు. అనంతరం వారు మీడియాతో మాట్లాడారు. కాగా 14ఎఫ్‌పై మంత్రి సాకె శైలజానాథ్ చేసిన వ్యాఖ్యలను మరో మంత్రి దానం నాగేందర్ వేరుగా ఖండించారు. శైలజానాథ్ వ్యాఖ్యలు సరికాదన్నారు. ముఖ్యమంత్రి, ప్రభుత్వం 14ఎఫ్ రద్దుకు చిత్తశుద్ధితో పని చేస్తుంటే ఆయన ఇలాంటి వ్యాఖ్యలు చేయడం సరికాదన్నారు. రద్దు చేసిన తర్వాతనే ఎస్ఐ పరీక్షలు నిర్వహించాలని ఆయన డిమాండ్ చేశారు.

Published On August 2, 2011