యడ్యూరప్ప అభ్యర్థి సదానంద గౌడ కొత్త ముఖ్యమంత్రి

బెంగళూరు: బిజెఎల్‌పి నేతకు రహస్య బ్యాలెట్ ద్వారా జరిగిన ఎన్నికల్లో సదానంద గౌడ ఎన్నికయ్యారు. కర్ణాటక ముఖ్యమంత్రి పీఠాన్ని సదానంద గౌడ అధిష్టించనున్నారు. దీంతో గత కొద్ది రోజులుగా కర్ణాటక రాజకీయాల్లో నెలకొన్న ప్రతిష్టంభన తొలగింది. యడ్యూరప్ప తన పంతాన్ని నెగ్గించుకున్నట్లయింది. యడ్యూరప్ప బలపరిచిన సదానంద గౌడకు వివాద రహితుడిగా, ఆర్ఎస్ఎస్ కార్యకర్తగా పేరుంది. ఆయన ప్రస్తుతం ఉడిపి నుంచి పార్లమెంటుకు ప్రాతినిధ్యం వహిస్తున్నారు. అధిష్టానం సూచించిన జగదీష్ షెట్టర్‌కు ఎదురు దెబ్బ తగిలింది. జగదీష్ షెట్టర్‌ కన్నా సదానంద గౌడకు 7 ఓట్లు అధికంగా వచ్చాయి. యడ్యూరప్ప వర్గం సంబరాలు చేసుకుంటున్నారు.

అంతకు ముందు ముఖ్యమంత్రి పీఠం కోసం ఇరువర్గాలు పట్టుబడడంతో బిజెఎల్‌పి నేత ఎన్నిక కోసం రహస్య బ్యాలెట్ ద్వారా ఓటింగ్ జరిగింది. ఇరు వర్గాలు బస్సుల్లో ఓటింగ్ కోసం వచ్చారు. ఆపద్ధర్మ ముఖ్యమంత్రి యడ్యూరప్ప వర్గీయులు మూడు బస్సుల్లో 67 మంది ఓటింగ్ కోసం వచ్చారు. అనంత కుమార్ కూడా తన వర్గీయులను కూడా బస్సుల్లోనే చేరవేశారు. ఓటింగ్ జరుగుతున్నంత సేపు తీవ్ర ఉత్కంఠ నెలకొంది. రెండున్నర గంటల ప్రాంతంలో రహస్య ఓటింగ్ ముగిసింది.

అంతకు ముందు ముఖ్యమంత్రి పీఠం కోసం పోటీ పడుతున్న లోకసభ సభ్యుడు డివి సందానంద గౌడ, మంత్రి జగదీష్ షెట్టర్ వర్గాల శాసనసభ్యుల భేటీ ఓ హోటల్లో జరిగింది. సమావేశంలో ఇరు వర్గాలు పరస్పర నినాదాలు చేశాయి. పరస్పర వాదనలతో గందరగోళం నెలకొన్న స్థితిలో బిజెపి కేంద్ర పరిశీలకులు రాజ్‌నాథ్ సింగ్, అరుణ్ జైట్లీ మౌన ప్రేక్షకుల్లా మిగిలిపోయారు. ఇరు వర్గాల మధ్య ఏకాభిప్రాయం కుదరకపోవడంతో రహస్య బ్యాలెట్ నిర్వహించాలని నిర్ణయించుకున్నారు. రహస్య బ్యాలెట్ ఓటింగ్ ప్రారంభం కాగానే పార్లమెంటు సభ్యులను, ఎమ్మెల్సీలను బయటకు వెళ్లాలని ఆదేశించారు.

ఆపద్ధర్మ ముఖ్యమంత్రి యడ్యూరప్ప సదానంద గౌడకు మద్దతు ఇస్తుండగా, బిజెపి రాష్ట్రాధ్యక్షుడు ఈశ్వరప్ప, అనంతకుమార్ జగదీష్ షెట్టర్‌ను బలపరుస్తున్నారు. 225 మంది సభ్యుల శానససభలో బిజెపి సభ్యులు 120 మంది ఉన్నారు.

English summary

Udipi MP Sadananda Gowda elected as BJLP leader and he will be the new CM of Karnataka in place of Yeddyurappa.