టిడిపిలో ఎప్పుడైనా చీలిక, అవమానిస్తారా: ఎర్రబెల్లి

వరంగల్: తెలుగుదేశం పార్టీలో ఎప్పుడైనా చీలిక రావచ్చునని ఆ పార్టీ సీనియర్ శాసనసభ్యుడు ఎర్రబెల్లి దయాకర రావు గురువారం విలేకరులతో అన్నారు. పార్టీలో తెలంగాణ, సీమాంధ్ర ప్రజా ప్రతినిధులు కలిసి ఉండే పరిస్థితి లేదన్నారు. పోలిట్ బ్యూరోలో ఎప్పుడైనా చీలిక రావచ్చునని అన్నారు. తెలుగుదేశం పార్టీ తెలంగాణ ప్రజాప్రతినిధులు తెలంగాణ కోసం రాజీనామాలకు ఎప్పుడూ సిద్దమే అని ప్రకటించారు. పార్లమెంటులో తెలంగాణ బిల్లు పెట్టాలనే డిమాండుతో ఈ నెల 6వ తారీఖున తెలంగాణ వ్యాప్తంగా ధర్నాలు చేపడతామని చెప్పారు. తెలంగాణ అంశం కేంద్రం పరిధిలోనిదని అన్నారు. ఏఐసిసి అధ్యక్షురాలు సోనియాగాంధీ, కేంద్ర మంత్రులు గులాం నబీ ఆజాద్‌, ప్రణబ్ ముఖర్జీ, చిదంబరంను తెలంగాణ అంశంపై ఎందుకు ప్రశ్నించరని అన్నారు.

తెలంగాణ ఐక్య కార్యాచరణ సమితి తెలంగాణ రాష్ట్ర సమితి తొత్తుగా మారిందన్నారు. జెఏసి అన్ని పార్టీలు, సంఘాలతో కలిసి రౌండ్ టేబుల్ సమావేశం ఏర్పాటు చేయాలని సూచించారు. అందరితో కలిసి రౌండ్ టేబులు నిర్వహించాలన్న తమ డిమాండును జెఏసి ఎందుకు పరిగణలోకి తీసుకోవడం లేదని ప్రశ్నించారు. బుధవారం టీచర్ల ఒక్క రోజు ధర్నాకు తమను పిలిచి అవమానించడం సరికాదన్నారు. తెలంగాణ కోసం ఎన్ని అవమానాలైన భరిస్తామని చెప్పారు. పార్లమెంటులో తెలంగాణ బిల్లు పెట్టే వరకు పోరాటం చేస్తామని చెప్పారు.

English summary

TDP senior MLA Errabelli Dayakar Rao blamed trs leaders for obstruct them at telangana teachers dharna. He demanded telangana jac to make round table meeting.