చిదంబరం ప్రకటనపై చంద్రబాబు మాట్లాడాలి: కిషన్ రెడ్డి

హైదరాబాద్: తెలుగుదేశం పార్టీ, కాంగ్రెసు పార్టీలలో ఏకాభిప్రాయం లేదని కేంద్రమంత్రి చిదంబరం చేసిన వ్యాఖ్యల ద్వారా తెలంగాణపై సమాధానం చెప్పాల్సిన బాధ్యత టిడిపి అధినేత చంద్రబాబు నాయుడు, కాంగ్రెసు అధినేత్రి సోనియా గాంధీ పైనే ఉందని భారతీయ జనతా పార్టీ రాష్ట్ర అధ్యక్షుడు జి.కిషన్ రెడ్డి ఓ టీవీ ఇంటర్వ్యూలో అన్నారు. ప్రత్యేక రాష్ట్రం ఏర్పాటు ద్వారా ఇటు తెలంగాణకు, అటు ఆంధ్ర ప్రజలకు మేలు జరుగుతుందన్నారు. త్వరలో బిజెపి ఆధ్వర్యంలో రాష్ట్ర విభజనపై ఎపిలో ప్రజాభిప్రాయ సేకరణ చేస్తామని అన్నారు.

తెలంగాణపై కాంగ్రెసు పార్టీలో ఏకాభిప్రాయం వస్తుందో లేదో తెలియదు. కానీ ప్రజలు మాత్రం కాంగ్రెసును పారద్రోలాలనే అభిప్రాయంతో ఉన్నారని అన్నారు. కేంద్రం తెలంగాణపై మోసపూరిత ప్రకటనలతో కాలాయాపన చేస్తోందన్నారు. మూడు రాష్ట్రాలు ఇచ్చిన సమయంలో తెలంగాణకు టిడిపి అడ్డుపడిందన్నారు. సీమాంధ్ర ప్రజా ప్రతినిధులు మభ్య పెట్టి తెలంగాణ అడ్డుకునే ప్రయత్నాలు చేస్తున్నారని ఆరోపించారు. పార్లమెంటు సాక్షిగా ఒకే పార్టీకి చెందిన సర్వే సత్యనారాయణ ఒక రకంగా, కావూరి సాంబశివరావు మరో రకంగా మాట్లాడుతున్నారని అన్నారు. తెలంగాణపై కాంగ్రెసు ద్వంద్వ విధానం వీడాలని అన్నారు.

English summary

BJP state president G.Kishan Reddy demanded today TDP chief Chandrababu Naidu response on Chidambaram's comments.