కెసిఆర్ చిదంబరానికి నిత్యపూజ చేయాలి: గాదె

By Srinivas

Published: Monday, August 8, 2011, 16:39 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు కేంద్ర మంత్రి చిదంబరం ఫోటోను ఇంట్లో పెట్టుకొని పూజలు చేయాలని మాజీ మంత్రి గాదె వెంకటరెడ్డి అన్నారు. చిదంబరం కెసిఆర్‌ను సేవ్ చేశారని అన్నారు. చిదంబరం మాటలను వక్రీకరించవద్దని కెసిఆర్‌కు హితవు పలికారు. ఆయన మాటలలో ఎలాంటి తప్పు లేదని చెప్పారు. చిదంబరం మాటలను ఆయన ఎలా అర్థం చేసుకోకుండా మాట్లాడుతున్నారని అన్నారు. కెసిఆర్ జీవితాన్ని చిదంబరం రక్షించాడని మరో నేత పాలడుగు వెంకట్రావు అన్నారు. సమైక్యాంధ్రను డిమాండ్ చేస్తూ ఈ నెల 10వ తేదిన 16 మంది సీమాంధ్ర ప్రజాప్రతినిధులు ఢిల్లీ వెళతామని మంత్రి శైలజానాథ్ చెప్పారు.

సీమాంధ్ర ప్రజాప్రతినిధులు సమైక్యాంధ్రకే కట్టుబడి ఉన్నారని అన్నారు. అంబేడ్కర్ సైతం తెలుగు ప్రజలు కలిసి ఉండాలని కోరుకున్నారని అన్నారు. రాష్ట్రంపై ఏకాభిప్రాయం అవసరమే అని అన్నారు. కాంగ్రెసు పార్టీ తెలంగాణపై ఎప్పుడూ తన నిర్ణయం చెప్పలేదని అన్నారు. గతంలో రోశయ్య హయాంలో తీర్మానం ప్రవేశ పెట్టిన సమయంలోనూ కాంగ్రెసు అభిప్రాయం చెప్పలేదన్నారు. అసెంబ్లీలో తీర్మానం ప్రవేశ పెడితే వీగిపోతుందని చిన్న పిల్లల్ని అడిగినా చెబుతారని అన్నారు. తెలంగాణ ఉద్యోగుల సమ్మెపై ప్రభుత్వం ప్రజాస్వామ్యబద్దంగానే వ్యవహరిస్తోందని అన్నారు.

Published On August 8, 2011