రాష్ట్రంలో పరిష్కారం ఐతే చిదంబరం ఎందుకు?: కెసిఆర్

హైదరాబాద్: తెలంగాణ అంశానికి తెలుగు ప్రజలే పరిష్కారం చూపిస్తే ఇక కేంద్ర హోంమంత్రి చిదంబరం ఎందుకని తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు మంగళవారం టిఆర్ఎస్ భవనంలో జరిగిన మహిళా భేటీలో అన్నారు. చిదంబరం మాటలు అర్థం లేకుండా ఉన్నాయని విమర్శించారు. తెలంగాణ ఇస్తామని కాంగ్రెసు ఎన్నికల ముసాయిదాలో పెట్టారని ఆయన అన్నారు. తెలంగాణ కోసం తుది శ్వాస వరకు పోరాటం కొనసాగుతుందని అన్నారు. తెలంగాణ మహిళలు సమ్మక్క - సారక్కలకు వారసులని అన్నారు. మహిళలకు చట్టసభల్లో రిజర్వేషన్లు కేటాయించే విషయంలో కృషి చేస్తామని చెప్పారు. మహిళల్లో గొప్ప ప్రతిభ ఉన్న వారు ఎంతో మంది ఉన్నారని చెప్పారు.

ఇతర దేశాల్లో ప్రజాప్రతినిధులు వాస్తవిక దృక్ఫథంతో పని చేస్తారని మన దేశంలో మాత్రం అలా లేదన్నారు. తెలంగాణ ఉద్యమం పదకొండు ఏళ్లకు చేరిందన్నారు. కృష్ణా, గోదావరి నీళ్లు కావాల్సినన్ని ఉండగా తెలంగాణ ప్రజలు అవస్థలు ఎందుకు పడాలని ప్రశ్నించారు. దుబాయ్‌లో తెలంగాణ ప్రజల తీవ్ర ఇబ్బందులు ఎదుర్కొంటున్నారని అన్నారు. సకల జనుల సమ్మెకు మద్దతుగా మహిళలు భారీగా ర్యాలీ తీయాలని ఆయన కోరారు. తెలంగాణ విద్యార్థి ఐక్య కార్యాచరణ సమితి చేపట్టిన బుధవారం నాటి బందును అందరూ విజయవంతం చేయాలని ఆయన విజ్ఞప్తి చేశారు.

English summary

TRS chief K Chandrasekhar Rao questioned union minster P.Chidambaram for Telangana issue.