తెలంగాణ బంద్: పలుచోట్ల బస్సులు ధ్వంసం

హైదరాబాద్: తెలంగాణ విద్యార్థి జాయింట్ యాక్షన్ కమిటీ పిలుపు మేరకు బుధవారం తెలంగాణలోని పది జిల్లాల్లో బస్సు డిపోలకు తాళాలు వేశారు. బస్సులు రోడ్ల పైకి ఎక్కకుండా తెలంగాణవాదులు అడ్డుకున్నారు. విద్యార్థి జెఏసి పిలుపు మేరకు రోడ్లన్నీ నిర్మానుష్యంగా మారాయి. కొన్ని చోట్ల జెఏసి నేతలు డిపోల ముందు బైఠాయించారు. 14ఎఫ్ రద్దు చేస్తున్నామని కేంద్రం నుండి సంకేతాలు వచ్చినప్పటికీ అధికారికంగా ఉత్తర్వులు బయటకు వచ్చే వరకు తమ నిరసన తెలియజేస్తామని అందులో భాగంగానే బందును కొనసాగిస్తున్నామని ఉస్మానియా విశ్వవిద్యాలయ విద్యార్థులు అన్నారు. గతంలో 2009 డిసెంబర్ 9 ప్రకటనను వెనక్కి తీసుకున్న కేంద్ర ప్రభుత్వంపై నమ్మకం లేకనే బందును కొనసాగిస్తున్నట్టు చెప్పారు.

కాగా బందు కారణంగా వరంగల్ జిల్లాలో 800, నల్గొండ జిల్లాలో 750, మెదక్ జిల్లాలో 600, ఖమ్మంలో 624, కరీంనగర్‌లో 700కు పైగా, అదిలాబాదులో 600కు పైగా, నిజామాబాదులో 629, మహబూబ్ నగర్‌లో 750కి పైగా బస్సులు డిపోల్లో నిలిచి పోయాయని సమాచారం. బయటకు వచ్చిన బస్సులను విద్యార్థులు అడ్డుకొని టైర్లలో గాలులు తీసేస్తున్నారు. మహబూబ్ నగర్‌లోని షాద్ నగర్‌లో రెండు, హైదరాబాదులోని వనస్థలిపురంలో నాలుగు, జగద్గిరిగుట్ట వద్ద రెండు బస్సులపై తెలంగాణవాదులు దాడి చేసి బస్సులను ధ్వంసం చేశారు. కాగా కొందరు ఆందోళనకారులను పోలీసులు అదుపులోకి తీసుకున్నారు. బంద్ కారణంగా నిత్యం రద్దీగా ఉండే మహాత్మా గాంధీ, జూబ్లీ బస్ స్టేషన్ పూర్తిగా బోసి పోయాయి.

English summary

Buses not seen on roads in Telangana region by Telangana Student JAC bandh call. Students obstructed buses and teared bus glasses which are on roads.