కెవిపిపై దుమ్మెత్తిపోసిన సోమిరెడ్డి చంద్రమెహన్ రెడ్డి

హైదరాబాద్‌: దివంగత నేత వైయస్ రాజశేఖర రెడ్డి ప్రియమిత్రుడు, రాజ్యసభ సభ్యుడు కెవిపి రామచందర్ రావుపై తెలుగుదేశం పార్టీ నాయకుడు సోమిరెడ్డి చంద్రమోహన్ రెడ్డి దుమ్మెత్తిపోశారు. వైఎస్‌ హయాంలో జరిగిన అవినీతి కుంభకోణాల్లో కేవీపీ రామచంద్రరావు కీలక పాత్రధారి అని ఆయన ఆరోపించారు. అప్పటి అవినీతి, అక్రమాలపై సీబీఐ దర్యాప్తుకు ఆదేశించడం హర్షణీయమన్న ఆయన ఆ విచారణ ఒక్క జగన్‌పైనే జరగడం వల్ల పూర్తిస్థాయిలో కుంభకోణాలు బయటపడవన్నారు.

జగన్‌, కేవీపీ ఇద్దరిపైనా విచారణ జరిపిస్తే వాస్తవాలు వెలుగులోకి వస్తాయన్నారు. వైఎస్‌ కంటే ముందు 13 మంది ముఖ్యమంత్రులు రాష్ట్రాన్ని పాలించారని, వారంతా కలసి 58వేల కోట్లు అప్పు చేస్తే వైఎస్‌ ఒక్కరే 60వేల కోట్లు అప్పు చేసిన విషయాన్ని ఆయన గుర్తు చేశారు. జగన్‌ అవినీతి సొమ్మును బయటకు తెస్తే రాష్ట్ర ప్రజలంతా అప్పుల్లోంచి బయట పడతారన్నారు.

English summary

TDP leader Somireddy Chandramohan Reddy lashed out at KVP Ramachandra Rao.