ఈ రోజుకు ఈ రోజే జగన్‌ను విచారించలేం: సిబిఐ డిజి

By Srinivas

Published: Thursday, August 18, 2011, 10:43 [IST]

హైదరాబాద్: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిని ఈ రోజుకు ఈరోజే విచారించలేమని సిబిఐ డైరెక్టర్ జనరల్ లక్ష్మీ నారాయణ గురువారం ఓ ఛానల్‌తో మాట్లాడుతూ అన్నారు. తనిఖీలకు మేము అనుకున్న సమయం కంటే ఎక్కువ సమయం పట్టేలా ఉందని అందుకే ఇప్పటికిప్పుడు జగన్‌ను విచారించే అవకాశం లేదని ఆయన అన్నారు. ప్రస్తుతం తాము తనిఖీల పైనే దృష్టి సారించినట్లు చెప్పారు. తనిఖీల నేపథ్యంలో సిబిఐ డిజి లక్ష్మీ నారాయణ గురువారం హైదరాబాదులోని జగన్ ఇంటికి వెళ్లారు. అప్పుడు విలేకరులు తనిఖీలపై ప్రశ్నించగా మాకన్నా మీకే ఎక్కువ తెలుసునని అన్నారు.

కాగా జగన్‌కు చెందిన కంపెనీలపై, ఆయన ఇంటిపై, జగన్ కంపెనీలలో పెట్టుబడులు పెట్టిన కంపెనీల యాజమాన్యాలపై, వారి ఇళ్లలో సిబిఐ అధికారులు సోదాలు చేస్తున్న విషయం తెలిసిందే. విశాఖపట్నంలోని జగన్‌కు సంబంధించిన ఆస్తులపై, శ్రీకాకుళం జిల్లాలోని పవర్ ప్లాంటు కార్యాలయాలలోనూ సిబిఐ సోదాలు నిర్వహిస్తోంది. బంజారాహిల్సులోని పులివెందుల పాలిమర్సులోనూ సిబిఐ అధికారులు సోదాలు చేస్తున్నారు.

Published On August 18, 2011