చిరంజీవికి పళ్లంరాజు అల్పాహార విందు, జైపాల్ హాజరు

By Pratap

Published: Saturday, August 20, 2011, 13:23 [IST]

న్యూఢిల్లీ: కాంగ్రెసు తీర్థం పుచ్చుకోవడానికి ఢిల్లీ వచ్చిన చిరంజీవికి కాంగ్రెసు పెద్దలు విందుల మీద విందులు ఇస్తున్నారు. చిరంజీవికి, ఆయన ప్రజారాజ్యం పార్టీ శానససభ్యులకు కేంద్ర మంత్రి పళ్లంరాజు శనివారం ఉదయం అల్పాహార విందు ఇచ్చారు. శుక్రవారం రాత్రి కాంగ్రెసు పార్టీ పార్లమెంటు సభ్యుడు టి. సుబ్బిరామిరెడ్డి చిరంజీవికి విందు ఇచ్చారు. పళ్లంరాజు ఇచ్చిన విందుకు కేంద్ర మంత్రి ఎస్ జైపాల్ రెడ్డి, రాజ్యసభ సభ్యుడు కెవిపి రామచందర్ రావు, ఇతర సీమాంధ్ర పార్లమెంటు సభ్యులు హాజరయ్యారు.

కాంగ్రెసులో తమ పార్టీ విలీనం వల్ల మంచి జరుగుతుందని ప్రజారాజ్యాం పార్టీ శాసనసభ్యులు అభిప్రాయపడ్డారు. సామాజిక న్యాయ సాధన కోసం తమ పార్టీ విలీనం జరుగుతోందని శాసనసభ్యురాలు వంగా గీత అన్నారు. చిరంజీవి చేరిక వల్ల తమ కాంగ్రెసు పార్టీ బలపడుతుందని పార్లమెంటు సభ్యుడు హర్షకుమార్ అన్నారు. ప్రజాకర్షణ గల చిరంజీవి చేరిక తప్పకుండా కాంగ్రెసుకు బలాన్నిస్తుందని ఆయన అన్నారు. కాంగ్రెసుకు చిరంజీవి వల్ల మంచి జరుగుతుందని ఆయన అన్నారు.

Published On August 20, 2011