లగడపాటి రాజగోపాల్ సోదరుడిపై కేసేది?: అంబటి

By Srinivas

Published: Sunday, August 21, 2011, 12:44 [IST]

హైదరాబాద్: విజయవాడ పార్లమెంటు సభ్యుడు లగడపాటి రాజగోపాల్ తమ్ముడు, లార్స్ కో అధినేత లగడపాటి శ్రీధర్‌ పేరు ఎఫ్ఐఆర్‌లో లేకపోవడాన్ని వైయస్సార్సీ పార్టీ అధికార ప్రతినిధి అంబటి రాంబాబు ఆదివారం ప్రశ్నించారు. తమ పార్టీ అధినేత వైయస్ జగన్మోహన్ రెడ్డి ఆస్తులపై సిబిఐ దాడులను చూస్తుంటే చాలా అనుమానాలు కలుగుతున్నాయని ఆయన అన్నారు. లగడపాటి శ్రీధర్ జగన్‌కు చెందిన కంపెనీలలో డబ్బులు పెట్టినప్పటికీ ఆయన పేరు ఎఫ్ఐఆర్‌లో ఎందుకు లేదన్నారు. కాంగ్రెసుకు అనుకూలంగా ఉండే వారిని తప్పించి, జగన్ అనుకూలురని మాత్రమే వేధించే కుట్ర జరుగుతుందని ఆయన అనుమానం వ్యక్తం చేశారు. లగడపాటి రాజగోపాల్ నిత్యం జగన్‌ను విమర్శిస్తున్నాడు కాబట్టే ఆయన తమ్ముడి పేరు చేర్చలేదనే అనుమానాలు కలుగుతున్నాయన్నారు.

ఏఐసిసి అధ్యక్షురాలు సోనియా గాంధీ, కేంద్ర మంత్రులు గులాం నబీ ఆజాద్, అహ్మద్ పటేల్‌లకు అనుగుణంగా మాట్లాడిన వారు పెట్టబడులు పెట్టిన వారిని పట్టించుకోవడం లేదని కేవలం జగన్ వర్గాన్నే టార్గెట్ చేసినట్టుగా కనిపిస్తోందన్నారు. సిబిఐ నిష్పక్షపాతంగా దర్యాఫ్తు చేయాలని అన్నారు. జగన్‌ను అణిచి వేయాలని కాంగ్రెసు, తెలుగుదేశం పార్టీ కలిసి కుట్ర చేస్తున్నాయని ఆరోపించారు. వారి కుట్రలను సమర్థవంతంగా తిప్పికొట్టేందుకే జగన్ వర్గ శాసనసభ్యులు భేటీ అవుతున్నారని చెప్పారు. జగన్‌కు ఏమైనా అయితే సహించేది లేదన్నారు. అందరినీ ప్రజాస్వామ్య పద్ధతిలో ఎదుర్కొంటామని చెప్పారు. కాంగ్రెసు, టిడిపిని కూకటివెళ్లతో పెకిలిస్తామని అన్నారు.

Published On August 21, 2011