ప్రాణం పోయినా దీక్షపై వెనక్కి తగ్గను: అన్నాహజారే

By Srinivas

Published: Wednesday, August 24, 2011, 12:01 [IST]

న్యూఢిల్లీ: తన ప్రాణం పోయినా కేంద్ర ప్రభుత్వం తమ ప్రతిపాదనలు ఆమోదించే వరకు దీక్షపై వెనక్కి తగ్గేది లేదని సంఘ సంస్కర్త అన్నా హజారే బుధవారం అన్నారు. అవినీతి నిర్మూలనపై కేంద్రానికి చిత్తశుద్ధి లేదని విమర్శించారు. గ్రామస్థాయి నుండి ప్రధానమంత్రి వరకు అందరూ లోక్‌పాల్ పరిధిలోకి రావాల్సిందేనని ఆయన డిమాండ్ చేశారు. రుణాలు తీసుకున్న పేద రైతులు మళ్లీ అప్పులు తీర్చలేని పరిస్థితుల్లో ఉన్నారని ఆవేదన వ్యక్తం చేశారు. పుట్టిన ప్రతి బిడ్డ పైన రూ.25 వేల అప్పు ఉంటుందని అప్పుతో ఉండటానికి వారేం పాపం చేశారని ఆయన ప్రశ్నించారు. అధికారులు, నాయకులు వాటాలు వేసుకొని పంచుకుంటున్నారని ఆరోపించారు.

లోకాయుక్త విషయంలో కేంద్రం జోక్యం చేసుకోవద్దని సూచించారు. దానికి స్వయం ప్రతిపత్తి కల్పించాలని డిమాండ్ చేశారు. కేంద్రం ప్రతిపాదనలు అంగీకరించాలని లేదంటే ప్రాణం ఉన్నంత వరకు పోరాటం చేస్తానన్నారు. అవినీతిపై పోరాటం ఇది ఆరంభం మాత్రమే అని అవినీతిరహిత సమాజం కోసం సుదీర్ఘ బాటలు వేయాల్సిన అవసరం ఉందన్నారు. అవినీతిపై ప్రజల నుండి ఇంత పెద్ద ఎత్తున వ్యతిరేకత వస్తున్నప్పటికీ ఇప్పటికీ కేంద్రానికి అవినీతిని నిర్మూలించాలన్న చిత్తశుద్ధి లేదని విమర్శించారు. అవినీతి నిర్మూలిస్తే తమ నోటి దగ్గర కూడు పోతుందన్న ఆలోచనలో నాయకులు ఉన్నారని విమర్శించారు. లోక్‌పాల్ పరిధిలోకి గ్రామస్థాయి నుండి ప్రధాని వరకు అందరూ ఉంటారన్నారు.

లోక్‌పాల్ ద్వారా ప్రతి పౌరుడు కేటాయింపుల్లోని సమాచారం తెలుసుకుంటాడనే భయం నేతలలో ఉందన్నారు. అవినీతిపై అన్ని స్థాయిల్లో ప్రజలు ఫిర్యాదు చేస్తున్నారన్నారు. గ్రామాలే దేవాలయాలు - ప్రజలే దేవుళ్లు - వారి సేవే పరమాత్ముని సేవ అని నాయకులు, అధికారులు గుర్తుంచుకోవాలన్నారు. విశృంఖల వ్యవస్థలో ఎక్కడా అవినీతిని నిర్మూలించాలన్న చిత్తశుద్ధి ప్రభుత్వంలో కనిపించడం లేదన్నారు. ఐఏఎస్, ఐపిఎస్ అధికారులు సేవ మరిచి లంచాలకు మరిగారని విమర్శించారు. వారు తల్చుకుంటే 60 ఏళ్లుగా సాధ్యం కానిది పదేళ్లలో సాధ్యమవుతుందన్నారు. తాను ఆరోగ్యంగానే ఉన్నానని చెప్పారు. ఆరు కేజీలు మాత్రం తగ్గానన్నారు.

Published On August 24, 2011