తెలంగాణకు రోశయ్యే మొట్టమొదటి విలన్: కె కేశవరావు

By Srinivas

Published: Sunday, August 28, 2011, 16:39 [IST]

హైదరాబాద్: తెలంగాణకు మాజీ ముఖ్యమంత్రి కొణిజేటి రోశయ్యే మొట్టమొదటి విలన్ అని కాంగ్రెసు పార్టీ సీనియర్ నాయకుడు, రాజ్యసభ సభ్యుడు కె కేశవ రావు ఆదివారం ధ్వజమెత్తారు. కాంగ్రెసు పార్టీ అధిష్టానం ఆదేశించినప్పటికీ అసెంబ్లీలో తీర్మానం ప్రవేశ పెట్టలేదని కెకె ప్రశ్నించారు. తెలంగాణపై తీర్మానం ప్రవేశ పెట్టక పోవటం ద్వారా తెలంగాణ ప్రజలకు, ఏఐసిసి అధ్యక్షురాలు సోనియా గాంధీకి రోశయ్య వెన్నుపోటు పొడిచారన్నారు. పార్టీ ఆదేశించినప్పటికీ 2009 డిసెంబర్‌లో బిల్లు పెట్టక పోవడం ద్వారా చిదంబరం వ్యాఖ్యలు పార్లమెంటును మభ్య పెట్టేందుకే అని రోశయ్య భావిస్తున్నారా అని ఆయన ప్రశ్నించారు.

బిల్లు ఎందుకు ప్రవేశ పెట్టలేదో సమాధానం చెప్పాకే రోశయ్య గవర్నర్‌గా బాధ్యతలు చేపట్టాలని డిమాండ్ చేశారు. రోశయ్య సమాధానం చెప్పాక చిదంబరంకు సభా హక్కుల ఉల్లంఘన నోటీసులు పరిశీలిస్తామని చెప్పారు. మూడు నెలల్లో తెలంగాణ సమస్య పరిష్కారమవుతుందన్న ముఖ్యమంత్రి కిరణ్ కుమార్ రెడ్డి వ్యాఖ్యలను స్వాగతిస్తున్నట్లు చెప్పారు. సిఎం తన వ్యాఖ్యలను సీరియస్‌గా తీసుకోవాలన్నారు. అసెంబ్లీని సమావేశపరిచి వెంటనే తెలంగాణ తీర్మానం చేయించాలని డిమాండ్ చేశారు. తెలంగాణ ఇస్తామని హామీ ఇస్తే ఉద్యమం నుండి వెనక్కి తగ్గుతామని చెప్పారు.

Published On August 28, 2011