జగన్ పార్టీకి రంగు, రుచి లేదు: ఎర్రన్నాయుడు

By Srinivas

Published: Tuesday, August 30, 2011, 13:20 [IST]

గుంటూరు: కడప పార్లమెంటు సభ్యుడు వైయస్ జగన్మోహన్ రెడ్డి స్థాపించిన వైయస్సార్ కాంగ్రెసు పార్టీకి సిద్ధాంతం, రంగు, రుచి లేదని తెలుగుదేశం పార్టీ సీనియర్ సీనియర్ నాయకుడు ఎర్రన్నాయుడు మంగళవారం గుంటూరు జిల్లాలో విమర్శించారు. కాంగ్రెసు, వైయస్సార్ కాంగ్రెసు రెండు పార్టీలు అవినీతిలో కూరుకు పోయాయని ఆరోపించారు. అక్రమ ఆస్తులు కాపాడుకోవడానికే వైయస్సార్ కాంగ్రెసు పార్టీ ఆవిర్భవించిందని ధ్వజమెత్తారు. భారతీయ జనతా పార్టీతో జగన్ రహస్య ఒప్పందం ఏమిటో బహిర్గతం చేయాలని డిమాండ్ చేశారు. అవినీతికి పాల్పడ్డ జగన్‌కు మద్దతు పలుకుతూ అవినీతికి వ్యతిరేకంగా బిజెపి పోరాడటం సిగ్గుచేటన్నారు.

తెలుగుదేశం పార్టీ అవిశ్వాసం పెడుతుందన్న భయంతోనే అధికార కాంగ్రెసు పార్టీ శాసనసభ సమావేశాలు నిర్వహించడం లేదన్నారు. తాము సమావేశాలు ఎప్పుడు నిర్వహించినా అవిశ్వాసం పెట్టడానికి సిద్ధంగా ఉన్నామన్నారు. ముఖ్యమంత్రి కిరణ్ కుమార్ రెడ్డి పాలన గాలికొదిలేశారన్నారు. తన కుర్చీ కాపాడుకోవడానికి ముఖ్యమంత్రికి సమయం సరిపోతుందన్నారు. రాష్ట్రంలో రాక్షస ప్రభుత్వం కొనసాగుతోందన్నారు.

Published On August 30, 2011