జగన్ ఎమ్మెల్యేలను చూసి సిగ్గు తెచ్చుకోవాలి: కెసిఆర్

By Srinivas

Published: Wednesday, August 31, 2011, 19:44 [IST]

హైదరాబాద్: వైయస్సార్సీ పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఒక్కడి కోసం 26 మంది ఎమ్మెల్యేలు రాజీనామాలు చేశారని వారిని చూసి తెలంగాణ ప్రాంత కాంగ్రెసు ప్రజా ప్రతినిధులు సిగ్గు తెచ్చుకోవాలని తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు బుధవారం విమర్శించారు. తెలంగాణకు అన్ని విధాలా అన్యాయం జరిగిందన్నారు. తెలంగాణ విషయంలో రాజ్యాంగ ఉల్లంఘన జరిగిందన్నారు. పెద్ద మనుషుల ఒప్పందాన్ని పెద్ద మనుషులే ఉల్లంఘించారన్నారు.

బొగ్గు మన వద్ద ఉంటే కరెంట్ వాళ్లకు ఉందన్నారు. ఇలా వసతులు మన వద్ద ఉంటే సౌకర్యాలు వారు అనుభవిస్తున్నారని విమర్శించారు. తెలంగాణను ఆంధ్రా పెట్టుబడిదారులు నిత్యం దోపిడీ చేస్తున్నారని ఆరోపించారు. తెలుగుదేశం పార్టీ నేతలకు తెలంగాణపై చిత్తశుద్ధి లేదన్నారు. అందుకే వారు రాజీనామాలకు ముందుకు రావడం లేదన్నారు. కాంగ్రెసు వాళ్లు రాజీనామాలు చేస్తే మేం చేస్తామని చెబుతూ ప్రజలను మభ్య పెడుతున్నారన్నారు. తెలుగుదేశం పార్టీ అధినేత తెలంగాణపై మాట మార్చారన్నారు. టిడిపి ఎమ్మెల్యేలు రాజీనామా మాట మరిచి చంద్రబాబుతో తెలంగాణకు అనుకూలంగా లేఖ ఇప్పిస్తే చాలన్నారు.

తెలంగాణ ప్రజాప్రతినిధులు రాజీనామాలు చేస్తే ఉప ఎన్నికలు రావని తెలంగాణ వస్తుందన్నారు. రాజీనామా చేసిన ఎమ్మెల్యేలను గెలిపించడానికి నేను ప్రజల కాళ్లు మొక్కుతానన్నారు. కాంగ్రెసు, టిడిపిలు రాజీనామాల పేరుతో నాటకాలు ఆడుతున్నాయని విమర్శించారు. తెలంగాణ కోసం రాజీనామా చేయని ఎమ్మెల్యేలకు వ్యతిరేకంగా భారీగా ర్యాలీలు నిర్వహించాలని కోరారు. కాంగ్రెసు నేతలు రాజీనామా చేయకుండా ప్రభుత్వాన్ని కాపాడే ప్రయత్నాలు చేయవద్దని హెచ్చరించారు.

Published On August 31, 2011